Vawiin  dar 10:30 am khan Pu K. Lalnghinglova IAS, Electoral Roll Observer, Mamit District hovin DC’s Conference Hall, Mamit-ah Special Summary Revision of Electoral Roll, 2013 chungchangah meeting neih a ni.

He meeting hi Pu R.S Lalzamliana, Addl D.C Mamit in kaihhruaiin Pu K. Lalnghinglova IAS ER Observer chuan Roll Revision chungchangah tlawmngai pawl te, Political party hrang hrangte hmalakna-ah lawmthu sawiin tun dinhmunah harsatna em em sawi tur a awm lo hi a lawmawm hle a ni a ti a. Election chungchangah hian Election Commission of India hi a duh tuiin a fimkhur hle a ni tiin Expenditure Observer bakah Security observer te pawh siam anih thu sawiin a tlangpui thuin Mizoram hi hetiang kawngah hian kan tha viau a ni a ti bawk.

He hunah hian Pu Malsawmtluanga Election Officer, Mamit District in Roll Revision chungchangah an hmalak dante sawifiahin Bru Transit Camp a awmte leh Chakma, hmun kilkhawr zawka awmte avanga harsatna an tawh thu te sawiin Final Publication tih chhuah hunah a chiang mai dawn a ni a ti. Form 6 hmanga thunbelh dil hi Report hnuhnung berah mi 4343 an awm tih a sawi bawk.

Election Officer chuan EVM First Level Checking (FLC) pawh neih a nih tawh thusawiin EVM 180 ah Ballot Unit 17 leh Control Unit 7 chhia a awm thu a tarlang bawk a ni.

He meeting-ah hian Political Party hruaitute, tlawmngai pawl hruaitu te leh thuthar thehdarhtute an tel tha hle a ni.

Pu K. Lalnghinglova IAS, Commissioner and Secretary, Education Department hian vawiin dt 9th August 2013 vek hian Govt Mamit College tlawhin MZP Hqrs Mamit in zirtirtu indaih loh chungchanga an hmalakna a sawipui bawk.