Mualkhang atanga Kawnpui kawng siam mek chu nimin khan Parliamentary Secretary (PWD) Pu Lal Thanzara'n a hmunah a en.

Parliamentary Secretary chuan he lai kawngin zin veivak te tana harsatna a thlen tih a hriat avanga a hmun ngei a kal a en chu tha a tih vanga kal anih thu sawiin, kawng tha awm nan theih tawp chhuah mek zel a ni a ti. Parliamentary Secretary hi Khamrang khawtlang hruaitu ten lo kawmin an khaw kawng highway in a hel tawh dawn vanga thlahthlam chuang lo tura ngenin, tuiluan kawrh tha tak leh kawng siam sak tur in an lo ngen bawk a. Heng an ngenna te hi a theih ang a lo ngaihtuah sak a tum thu Pu Lal Thanzara chuan a sawi.

He kawng siam nan hian Ministry Of Road Transport and National Highway chuan Package I (kawnpui atang 15km) atan vbc 61.71 leh Package II (Pualhrang lui thleng) vbc 67.57 a sanction a. He hna hi ABCI Infrastructure pvt.ltd in contract hna a thawk a. Kum 2014 Aprilah zawh hman beisei a ni.

Tunah hian nuai 72 chu kawng chhe zual lai siamthat nan ruahman a ni a, kawng chhuat hnuai lamah lung phah a ruahtui luang tlang thei (sub - surface range) siam nan hman a ni ang. Hei hian kawngchhiat vanga harsatna liantham a tih kian beisei a ni.

Parliamentary Secretary hi PWD hotu te leh kawng siamtu contractor ten tawiawm in hma chak zawk a lak theih dan tur te leh harsatna neuh neuh an tawh te an sawi ho a ni.