Vawiin khan Chief Minister Pu Lal Thanhawla chuan Dutlang Leitana cheng nuai 1707.89 senga sak State Institute of Rural Development and Panchayati Raj, chu kuthnathawktute inzirna leh intuaihriamna kawnga hmun pawimawh nia tangkai taka hman anih theih nan a hawng. SIRD &PR Complex hawn naah hian Home Minister leh Rural Development Department enkawltu Minister ni bawk Pu R. Lalzirliana; Finance Minister Pu Lalsawta, Higher Education Minister leh bialtu MLA ni bawk Pu R. Romawia; UD&PA Minister Pu Zodintluanga, Transport Minister Pu John Rotluangliana; AH&Vety Minister Pu C. Ngunlianchunga; Deputy Chief Whip Pu RL Pianmawia; Parliamentary Secretary pahnih - Lt.Col. (Rtd.) ZS Zuala leh Pu Hmingdailova Khiangte te leh Kolasib bialtu MLA Pu PC Zoram Sangliana bakah Sawrkar mi pawimawh dangte leh  leh Rural Development Department officer te leh SIRD Director dinhmun lo chelh tawh te an tel bawk a ni.

Chief Minister Pu Lal Thanhawla chuan State Institute of Rural Development & Panchyati Raj Complex thar, khawpui bul lawka hawn a ni chu Mizoram a bik takin Zokhaw lamah cheng kuthnathawktu leh tualchhung inrelbawlnaa mawhphurna nei te tan mellung pawimawh tak a nih thu sawiin he hmuna zirtirna leh intuaihriamna te kaltlangin Zokhaw lamah hmasawnna chak zawk a a thlen ka beisei a, an tan inzirna hmun pawimawh tak anih chhoh zel theih nan kawng tin rengin a thawktute te hi tanla leh zual turin ka chah duh che ni, a ti. Helai hmuna he Institute din anih theih nana theihtawp chhuahtu Rural Development Minister Pu R. Lalzirliana, bialtu MLA Pu R. Romawia te inpekna leh Department officer te thahnemngaihna te chu lawmawm a tih thu a tarlang bawk.

Ram in zalenna a hmuh hnua Sawrkar lo awm leh piang ten thingtlang leh a chenga mipuite hmasawnna leh an hamthatna tur chu tun thleng pawhin a ngaihpawimawh berte zinga a mi a nih thu sawiin Chief Minister chuan thingtlang tih hmasawn hi chona (challenge) lian ber vawiin thlengin a la ni reng a ni, a ti a. Kut hnathawk a eizawng hi kan ramah mi za zelah 70 vel awm nia chhut a ni a, kuthnathawh hi eizawnna pawimawh berte zinga a mi leh an tel lo chuan tu sawrkar mah a kal thei lova, heng te hriain leh ngaipawimawhin anni in lei rem an rah a, khaw eng an hmuh a, an khaw buzawlah lungmuang taka ei an zawnna kawngah leh Zokhaw lam kuthnathawk te chawikanna tur programme kan nei tawh thin a, vawiin thlenga la pui ber leh hlawhtling ber NLUP pawh hi chutiang atana ruahman a ni, a ti.

SIRD & PR din chhan ber chu thingtlang mite an lo changkan chhoh zel nana kawng hrang hranga an thiamna tihsan a, an theihna te tihpuna, chu chuan ei leh bar zawnna kawnga an lo than chhoh nan anih thusawiin ei leh bar, sum leh paia intodelh hi kan tum ber a ni a, chutiang turin nasa takin Sawrkar in hma a la a, hemi kawnga zirtirna pekna kawngah SIRD &PR hi in pawimawh hle a ni, a ti.

Thiamna chherchhuah (skill development) lamah te leh thingtlang a cheng mipuiten an hman thiam tawk computer zirna pek chungchangte tan lakna tur SIRD tan a awm thusawiin hengte hi tunlai khawvel thang chho zelah a pawimawh avangin ngaipawimawh turin hnathawktute a chah a. Institute chu thianghlim leh fai taka vawnga midangte tan entawntlak ni turin thawktu te hi a fuih bawk a ni.

Rural Development Department enkawltu Minister Pu R. Lalzirliana pawhin thusawiin ram kalsiama kan mi hmasa te mitthla-na hi Chief Minister hovin kan theihtawp chhuahin kan ti hlawhltling chho meka, mipuite leh ram tana he kan rawngbawlna hi Pathianin mal sawmin min kaihruai zel a, min ensan lova tiin ram himna leh damna turin hna kan thawk zel dawn a ni, a ti bawk.  

Programme hi Secretary Rural Development Department Pu Lalhmingthanga, IAS in kaihruaiin SIRD & PR tobul leh a hnathawh dante a sawi a. SIRD & PR Director Pi Maria CT Zuali chuan Complex sak chungchangah Technical Report sawiin hun a hmang a, Additional Secretary, Rural Development Department Pi Lalrinzuali chuan lawmthu sawiin hun a khar a ni.

SIRD & PR Complex thar hi June ni 26 2011 khan sak tan niin September ni 30 2016 khan sak zawh a ni a. A sak nan a sum ruahman chu cheng nuai 1707.89 niin a satu hi North East Consultancy Services (NECS) an ni. Campus zau zawng hi square metre 6442.62 campus huam chhunga hian building hrang hrang a awm a. Chhungte chu - Administrative Building, mikhual 18 awm theihna Guest House, khum 60 awmna Residential Hostel, Director Quarter, Deputy Director Quarter 2, Faculty quarters 6, Staff quarters 6 leh Grade VI quarters 6 bakah tui dahkhawlna 2, litre nuai 2.4 dawng leh litre nuai 1.7 dawng te awm a ni a. A project ah hian Internal road, land development work, boundary wall leh Gate te a tel bawk a ni.

SIRD & PR hi tun hma chuan State Institute of Rural Development tih niin kum 2000 chhoh vel khan Kolasib ah dahin bultan a ni a. Kum 5/6 kalta khan Ministry of Rural Development-in heng hmun te hi an pawimawh em avangin state capital hnaiha dan nise tiin state te hi thurawn a pe a, chumi zulzui chuan helai hmun hi buatsaih a lo ni ta a ni. SIRD & PR hian Lunglei leh Thingsulthliah ah te Extension Training Centre an nei mek a, Kolasib a an hmunpui ni thin pawh tangkai zawka hman a nih thei nan ruahmanna an siam mek a ni.