514/2026-2027

Aizawl the 14th May 2026: Vawiin khan Chief Minister Pu Lalduhoma chuan CM Conference Hall-ah General Administration Department enkawl Mizoram sorkar quarters luah dilna leh pekna online hmanga kalpuina Quarters Allotment Management System (QAMS) leh state pawna Mizoram House-te online hmanga book-na Mizoram House Online Reservation System a hawng.

Thusawiin Chief Minister chuan, sorkar quarters luah dilna hi lehkha thehluh hmangin kan kalpui a, computer pakhatah dahthat a ni a. Quarters ruak te, pension leh thihnate avanga han singsak ngaite pawh manual veka kalpui a ni a. A enkawltu department tan leh a diltute tan hian a buaithlakin hun a heh thin a.

Hetia online hmanga kalpui a nih hi chuan quarters luah dilna hi a hmuna va lak a, va thehluh leh kher ngai lovin, awlsam takin internet kaltlangin a tih theih tawh dawn a. A enkawltute lam tan pawh a lo awlsam phah dawn a ni.

Chutiang bawk chuan Mizoram House pawh office-a kala, va dil kher ngai lovin online hmang bawkin kan dil thei tawh dawn a. Aizawl pawna chengte tan phei chuan a hahdamthlak zual dawn a ni, a ti a. GAD thawktute leh online portal siamtu ICT leh Mizoram State e-Governance Society te chungah lawmthu a sawi.

Tunlai thiamna hmanga mipuite tana awlsamna siam hi kan sorkar hian a ngaipawimawh a. Uar deuh deuh a, Mizoram hi digital state-a siam hial kan duh a ni, a ti bawk.

Quarters Allotment Management System hi nikum August thla atanga buaipui tan kha a ni a. ICT Department te siam a ni a, a hman theih nghal a, a site address chu: qams.mizoram.gov.in a ni.

Mizoram House Online Reservation System hi Mizoram State e-Governance Society te siam a ni a. Kumin March ni 2 atang khan enchhin tan niim official-a hawn a nih hma hauhin dilna 2796 a lut hman a, mi 1640 te chu allotment pek an ni. A address chu: mizoramhouse.mizoram.gov.in a ni.

A hawnna inkhawm hi Pu Sudhir Kumar, Principal Secretary, GAD chuan a kaihruai a, Deputy Commissioner te leh Mizoram House enkawltuten online-in an rawn zawm a. Dr. YNL Reddy, Secretary, ICT chuan lawmthu sawiin inkhawm a titawp a ni.