515/2026-2027

Serchhip, the 14th May, 2024: Vawiin khan Serchhip Deputy Commissioner Office huaihawt ni hnih awh tur NMBA-Hriselna Kutpui chu, a hawnna inkhawm DC Pisapui Hall, DC Complex Serchhip-ah zing dar 10:00 khan buatsaih a ni a. Inkhawm hi SDO (Sadar) Pi Rebecca Laldinmawii Hrahsel-in kaihruaiin Serchhip DRDO Project Director Dr. Malsawmtluanga Fanchun-in khuallian niin a hawng a; hawnna inkhawmah hian sawrkar department hrang hrang hotute, khawtlang hruaitute leh Serchhip Doctor rualte bakah Aizawl atanga he Kutpui atana chah chhuah Doctor rualte an tel a ni.

Project Director Dr. Malsawmtluanga Fanchun chuan Nasha Mukt Bharat Abhiyan thiltum tlangpuite sawiin he ‘NMBA-Hriselna Kutpui’ ngaihtuah chhuaktu Serchhip Deputy Commissioner Pu Paul. L. Khuma hnenah lawmthu a sawi a. Ruihhlo laka fihlim bakah khua leh tuite hriselna chu NMBA thil tum pawimawh tak a nih thu sawiin, khawtlang hruaitu tha ni tur te, sawrkar hnathawk chak leh tangkai ni turtein hriselna leh nun dan (lifestyle) uluk chu thil pawimawh berte zinga mi a nih thu a sawi a. He Kutpui-ah hian chutiang inzirtirna hrang hrangte chu a duh apiang tan a thlawna buatsaih a nih thu sawiin, Serchhipa Doctor indaih lohna awm thin avanga mipuite tana harsat awm thinte pawh he NMBA Hriselna Kutpui kaltlang hian chhawk zangkhai tum a nih thu a sawi a, he Kut chhimtu mipuite chu hlawk taka he hun hi hmang theuh turin duhsakna a hlan a. Pi Lalchhanhimi, SDC Serchhip-in lawmthu sawiin Kut hawnna inkhawm hi a khar a ni.

NMBA-Hriselna Kutpui-ah hian mipuite tan a thlawna inentirna buatsaih niin Aizawl atangin heng - Medicine Specialist Dr. PC Lalramenga; Chuap leh thawkna lam Specialist Dr. Margaret Z. Khuma; Vun Specialist Dr. Nancy Lalnunpuii; Rilru lam Daktawr (Psychiatrist) Dr. Malsawmtluangi; Ruh leh Tha lam Specialist Dr. Jonathan Lalrempuia; Mit khawhmuhna lam Specialist Dr. Sabina Lalrinhlui; hmeichhe natna lam Specialist Dr. Lalhruaimawia leh Ha Daktawr Dr. Margaret Zonunmawii te an tel a. Anni bakah hian Serchhip atangin BSF Daktawr Dr. Krishnakant Pariha; Assam Rifle Daktawr Captain Karnajit Rago leh Serchhip District hospital atangin Dr. Fabian Malsawmkima leh Clinical Psychologist Jane Zodingliani Lailung te an thu bawk.

Ni khatnaa (14th May) inentir zat hi registration hawn chhung, zing dar 9:30 atanga tlai dar 2:00 thlengin mi 663 an tling a, doctor hrang hrang inentir zat record chu hetiang hi a ni:

1. Skin - 125
2. Medicine - 155
3. Psychiatry - 37
4. Ortho - 136
5. Eye - 99
6. Dental - 6
7. Gynae – 62
8. Pulmonary – 52

NMBA-Hriselna kutpuiah hian Awareness hrang hrang - rikrum thila nunna chhan dan (CPR pek dan, kangmei, chemical, electric shock, tui tla, Drugs OD leh adangte enkawl dan) te, ruihhlo that lohna inzirtirna te, ei leh in, fitness leh stress management te, hmeichhiate hriselna inzirtirnate bakah Inter-School Public Speaking Competition (health & drugs awareness) te buatsaih a ni bawk a. Kut hian naktuk may ni 15 thleng a awh dawn a ni.