516/2026-2027

Lawngtlai, 14th May 2026 : Vawiin khan Lawngtlai District Development Co-ordination and Monitoring Committee (DISHA) chu an Chairman, Pu Richard Vanlalhmangaiha, Member of Parliament (Lok Sabha) hovin DC Conference Hall-ah an ṭhukhawm.

Pu Richard Vanlalhmangaiha chuan kalkhawmte hnena lawmthu sawina a nei hmasa a. Sawrkarlaipui atanga scheme lo kal thin te tha leh rintlaka thawha, a hun tak zawh thin a pawimawh hle a ti a. A bik takin Line Department - ten mawhphurhna lian tak an nei tiin, ram leh hnam, mipuite tana thawk fo thin turin a chah a. A hun taka DISHA Meeting neih thin a tangkai hle tih tarlangin, Line department-te inbuatsaihna leh hna thawh fakawm a tih thu a sawi a. Lawngtlai District - chhunga sawrkarlaipui hnuaia scheme hrang hrang kalpuiah mipuiten hlawkna an neih te, ram hmasawnna te, ei leh bara intodelh te leh changkanna lam pante chu thil pawimawh tak a ni tiin, department hrang hrangte chu an hma zawn ṭheuhvah theih tawp chhuah chhunzawm zel turin a fuih a. Sawrkarlaipui Scheme- kalpuinaah harsatna awm thei a ni tih a hriatthiampui tih tarlangin, department - te inthlahrung lova a hnena thlen ṭhin tura chahin, a theih ang anga chin fel dan ngaihtuahpui a nih tur thu a sawi bawk a ni.

Lawngtlai DISHA ṭhutkhawmah hian Lawngtlai East bialtu MLA Dr. Lorrain Lalpekliana Chinzah, Adviser to Chief Minister ( H&FW, A&FW) leh Deputy Commissioner & Member Secretary Pu Donny Lalruatsanga te bakah, line department official-te, LADC leh CADC aiawhte, NGOs, MJA aiawh te an tel theih a. Kum 2025- 2026 chhunga Lawngtlai District-a sawrkarlaipui ruahmanna hnuaia hmasawnna hnathawh hrang hrang kalpui dan thlir ho niin, harsatna awmte leh a chin fel dan tur leh hma lak zui zel dan tur te sawiho a niin; zawhna leh chhanna hun hman a ni bawk.

He DISHA ṭhut khawmah hian sawrkar laipui scheme hrang hrang -Agriculture & FW Department hnuaia RKVY, SHC, PM-KISAN leh scheme dang te; Commerce & Industries Department hnuaia PMEGP te; School Education Department hnuaia Samagra Shiksha, PM-POSHAN (Mid-Day Meal) leh PM SHRI School te; Fisheries Department hnuaia PMMSY te; Food Civil Supplies & Consumer Affairs hnuaia National Food Security Act & Price Monitoring te; H&FW Department hnuaia National Health Mission (NHM) programme hrang hrang te; Lead Bank, SBI hmalakna te; PWD hnuaia PMGSY, PARIVAHAN te; PHE Department hnuaia JJM, SBM(G) leh Urban Water Supply Scheme te; P&E hmalakna te, RD&A Department hnuaia MGNREGS, PMAY-G, PMAY-G,PMKSY 2.0, MzSRLM leh DDU-GKY & RSETI te; Social Welfare Department hnuaia NSAP; Sports & Youth Services hnuaia hmalakna hrang hrang te; UD&PA Department hnuaia AMRUT 2.0, PMAY- HFA(Urban) 2.0 , SBM (U) te; Women & Child Development Department hnuaia ICDS, BBBP, PMMVY, Saksham & Poshan 2.0, leh Mission Shakti te; CADC hnuaia DILRMP leh SVAMITVA hmalakna leh thlen chin te sawiho a ni.

DISHA hi Ministry of Rural Development, Govt of India hnuaia programme niin District hrang hranga Central Sawrkar Scheme kalpuite vil bakah sawrkarlaipui scheme khawihtu department hrang hrangten thawhhona tha an neih theih nana hmalakna a ni a. Member of Parliament, Lok Sabha, chu Chairman- niin, Member of Parliament, Rajya Sabha chu Co- Chairman a ni a, District Bawrhsap- te hi Member Secretary an ni thung a ni.