2701/2026-2027

Aizawl the 15th October 2026: Vawiin khan Chief Minister Pu Lalduhoma, Finance Minister ni bawk chuan a office-ah Mizoram sorkar sum enkawlna lama kalphung thar pali (Digital Financial Management kalphung thar) Mizoram Integrated Works Accounts System (MIWAS), e-Budget Module, e-Sanction Module leh 100% Direct Benefit Transfer tharte a tlangzarh a. MIWAS hmanga bill hmasaber a pass nghal.

He hunah hian Pu Vanlalhlana, PWD Minister, Pu F. Rodingliana, P&E Minister leh Pu TBC Lalvenchhunga, Adviser to CM leh official pawimawhte an tel a ni.

Finance Department hnuaia kalpui heng hmalaknate hian sawrkar sum enkawlna kawngah langtlang leh dik taka sum hmanna a thlen dawn a. Eirukna venna hmanraw tha tak an ni bawk ang. 

Thu sawiin Chief Minister chuan, department thenkhatin sorkar kum tawpa SNA SPARSH an dah zero theih loh avangin sum tam tak a lapse tawh a, tun hnaiah Department thenkhatin a hun taka UC an thehluh theih loh avangin SASCI Fund approval kan hmu leh mai thei lo bawk a. Tun hnuah chuan Administrative Approval an hmuh atanga thla thum chhungin tender an tichhuak thei vek tawh tur a ni tih hi sorkar duhdan a ni.

Sorkar sum enkawlna kawngah lang tlang, thianghlim leh dik kan mamawh a. Sum reng reng hi a thlenna hmun tur dik taka a hun taka a thlen a tul a. Sum leh pai enkawlna tha zawk mamawhna hi a sang zel a ni. Chuvang chuan sorkar pawhin tan kan la a, kan phak tawka kan hmalaknaten rah tha a chhuah a, kum kalta khan Mizoram-in SASCI Part IX hnuaiah incentive cheng vaibelchhe 350 kan dawng a, 2026-27 chhung hian SASCI Part IV leh Part IX hnuaiah cheng vaibelchhe 650 vel hmuh leh kan beisei a ni a ti.

Mizoram-a digital financial infrastructure tihchakna kawnga thawktu Finance Department, ICT Department, Interlace India Pvt. Ltd. leh Centre for Development of Advanced Computing (C-DAC) te chungah lawmthu a sawi a ni.

Vawiina kan Digital Financial Management System hawn tharte chanchin tlangpui:

1. MIWAS (Mizoram Integrated Works Accounts System): MIWAS hian department paruk - Public Works Department (PWD), Public Health Engineering Department (PHE), Power & Electricity Department (P&E), Irrigation & Water Resources Department (IWRD), Environment, Forest & Climate Change Department (EFCC) leh Land Resources, Soil & Water Conservation Department (LRS&WC) hnuaia works accounts-te felfai zawkin a enkawl dawn a. Accountant General hnena sum hman dan leh Treasury kaltlanga expenditure voucher thehluhna kawngah a pui ang. A hriatthiam dan awlsam ber chu Cheque System nuaibona a ni.

2. e-Budget Module: e-Budget Module hmang hian IFMIS kaltlangin online-a budget proposal buatsaih leh thehluh theih a ni dawn a, hei hian kut-a thawh ngai, chhut sual awm thei leh thehlut tlai awm thinte a titlem ang.

3. e-Sanction Module: e-Sanction Module hmang hian sum hman phalna (expenditure sanction) online-a buaipui theih a ni tawh ang. Drawing and Disbursing Officer leh Head of Department atangin Administrative Department leh Finance Department hnenah electronic hmanga a thawn theih tawh dawn avangin hei hian budget-a sum awm bak hman palh tur thlengin a veng dawn a ni.

4. Sorkar laipui duh dana 100% Direct Benefit Transfer System: 100% DBT hnuaiah chuan State scheme hrang hrang - Thlai Thar Leina, Bana Kaih leh Power Subsidy hnuaia sum pek turte chu Treasury-in bill a pass hnuah beneficiary-te bank account-ah direct-in thawn nghal a ni tawh dawn a. IFMIS kaltlangin a payment status pawh chhui zui theih a ni tawh ang.

Heng bakah hian IFMIS hnuaiah tun hnaiah khan e-Voucher te, Pension module leh Employee Module 2.0 (e-HRMS) te siam an ni tawh a, hei hian Mizoram IFMIS hi nasa takin a tichangtlung tawh a ni.