2702/2026-2027

Champhai, dated 15th October, 2026 : Vawiin khan Pu Lalnghinglova Hmar, Minister, Excise & Narcotics Department (END) leh Labour, Employment, Skill Development & Entrepreneurship (LESDE) Department chuan Ruihhlo Do leh Mizoram Building & Other Construction Workers Welfare Board (MBOCWWB) awareness campaign chu Govt. Champhai College-ah khuallian niin a hmanpui a. Pu Satinder Kumar Bhalla, Secretary, North Eastern Council pawh he hunah hian a tel a ni.

Khuallian Pu Lalnghinglova Hmar chuan thu sawiin, MBOCWWB chu construction leh a kaihhnawha thawkten hamthatna hrang hrang an dawn theihna tura din a nih thu a sawi a. College zirlaite chu hemi Board chungchang midang hnena hrilhhretu ni turin a sawm a. Khuallian chuan Champhai-ah ruihhlo tam chhan pakhat chu a lei duh leh a ti duh an tam vang a nih thu sawiin, tun hma chuan Assam hi ruihhlo kalkawng ni ve tho mahse a ram mipuite chu an ruih ve duh ngai loh thu a sawi a. Zirlaite chu ruihhlo ti ve loh mai ni lovin, ti ve lo tura midang kaihruaitu ni turin a fuih a. High school, Higher leh College zirlaite zingah weed a hluar tih a hriat thu sawiin, Champhai college zirlaite tal chu ruihhlo laka fihlim tlat turin a fuih.

Minister Pu Lalnghinglova Hmar chuan Champhai-ah tourism a than nasat thu sawiin, tourism tihhmasawn nan Keilungliah chei that a nih tur thu leh Vangchhia-ah project hmachhawp a awm thu te a tarlang a. Mizoram pawn atanga khualzin lo lutte zingah awm tha duh lo leh buaina siamte an awm thei tih sawiin, hei hi tourism-in a ken tel a nih thu a sawi a. Hetiang thil thleng thei chungchangah sensitization kan neih that a pawimawh thu a sawi a. Mizoram chhung district hrang hranga chengte hi kan intlawhpawh nasat a, kan indawr tawn hian pawisa vir vel a ti pung a, local economy a tih that thu a sawi a. College zirlaite chu zirna kawngah tan la thara, hna lakna exam hrang hrangah inziak tlinga Champhai ti hming thatu ni turn a fuih.

NEC Secretary Pu Satinder Kumar Bhalla pawhin thu sawiin, zirlaite zinga hun a hmang thei leh thu sawina hun a nei chu lawmawm a tih thu a sawi a. Mizo-ten nunphunga kan neih tlawmngaihna chu entawntlak leh fakawm a ti a. A seilenna ram Punjab pawh ruihhlo vangin harsatna nasa tak an tawh thin thu a sawiin, kum 2047-a India hi ram changkanga hlangkai tur chuan heng ruihhlo leh thil tha lo dangte kan kalsan a, ram tihmasawn thei tur lama kan ngaihtuahna leh kan theihna kan sen a pawimawh thu a sawi a. Zirlaite chu thiam thil (skills) neia, mahni eizawnna mai bakah midangte tana eizawnna siam saktu ni turin a fuih.

Vawiin programme-ah hian Govt Champhai College Principal Pu Lalthanpuia’n inlawmna thu a sawi a. LESDE Deputy Director Pu H. Lalruatliana chuan MBOCWWB chungchang a sawizau a. Welfare Board member nih theih dan te sawiin, Inziahluh man hi Cheng 25 niin, thla tin fee hi Cheng 10 a ni a. Member-ten damloh nikhua te, nupui pasal neih te, hmeichhe member-in fa an neih te, member-te fa 2 chinah an zirna atan tanpuina dawn theih a nih thu te a sawi a. Zirlai kalkhawmte chu construction leh a kaihhnawiha inhlawh an awm chuan member ni tura sawmin, Board chungchang midangte hrilhhretu ni turin a chah bawk. 

END Jt. Commissioner Pu Peter Zohmingthanga chuan powerpoint presentation hmangin Mizoram-a ruihhlo hluar dan leh a nghawng tha lote a sawifiah a. December 31, 2025 thlenga chhinchhiah danah Mizoramah Injecting Drug Users (IDU) 12,839 an awm a, kum 1984 atanga October 7, 2026 chhung khan ruihhlo avanga boral mi 2051 an awm tawh a, mipa 1799 leh hmeichhia 252 an ni tih a tarlang a. Survey Report on Drugs and Children in Mizoram 2022-ah chuan Mizorama middle school zirlaite (kum 10-14 inkar) pawhin cannabis an hmang tan tawh tih tarlan a ni a. Ruihhlo do kawnga sawrkar leh NGO-te hmalakna tarlangin, zirlaiten anmahni zawn theuha ruihhlo laka fihlim tura an tih ve theihte a sawizau bawk.