3815/2024-2025

Aizawl, the 15th January 2025: Vawiin khan Aijal Club-ah Special State Level Bankers' Committee Mizoram for the quarter ended September, 2024 buatsaih a ni a. Chief Minister Pu Lalduhoma chuan telpuiin meeting a kaihruai.

Thu a sawinaah Chief Minister chuan, Mizoramah bank engemawzat awm ve tawh mah se a tam zawk hi Aizawl leh district capital-a inbun in la ni a. Banking network tha leh zau, hmun kilkhawr zawka mite ban phak kan mamawhna a sang hle. Lo inzar zau zel turin ka ngen a che u.

CD ratio in hma a sawn tih kan hmu a, kan lawm a. Mahse bank thenkhat CD ratio hniam leh lutuk, 40% aia hniam engemawzat in la awm a, hei hi chu a fel lovin kan hria. Bank thenkhat phei chuan 20% pawh in phak lo a ni. Kan ram atangin deposit in dawng khawm a, chuta tanga 20% vel kan ramah in puk chhuahtir a, a dang 80% vel state dangah in puk chhuahtir tihna a ni a. Hei hi Mizo mipuite zah lohna a tlingin ka hria. Sum dawn nan chauhva min rawn hmang bank hi kan mamawh  lem lo. Hmasawnna hna min thawhpuitu tur kan duh.  SLBC awm leh huna hma i sawnna report kan hmuh loh phei chuan ngawih ral kan tum lo. Kan ka kan an chuan dawrtu nei lo bank in ni ve der thei a ni, tiin CD ratio tha nei turin a hrilh a.  A bik takin Yes Bank, Bandhan Bank, Axis Bank, ICICI, HDFC, CBI, Federal Bank leh NESFB te chu lo tang zual turin a chah.

Chief Minister hian, priority sector lamah pawh lo inthlahdah lo ula, sawrkarin mirethei zawk te khai chhuah tumin Agriculture & Allied sector ah te, MSME lamah te thapui thawhin hma kan la chho dawn a, bank te hi kan thawhpui pawimawh ber zinga mi in ni. Staff indaih lohna kawngah pawh harsatna in tawh loh nan hma lo la theuh turin ka ngen che u a ni, tiin a chah.

Meetingah hian SLBC thutkhawm hnuhnung bera an rorel bawhzuina report an ngaithla hmasa a, chumi zawhah bank hrang hrang te deposit leh advances dinhmun thlirna te, sawrkar ngaihpawimawh bik sector hrang hranga Annual Credit Plan (ACP) dinhmun enfiahna te an nei a. Financial Inclusion lama an hmalakna te, RSETI lama an hmalakna te, Aspirational District & Block huam chhunga an hmalakna te, Mizorama large currency chest neih ve chungchang te bakah African Swine Fever lam hawi hmalakna te pawh an sawiho bawk.

Meetingah hian Pu TBC Lalvenchhunga, Adviser to CM, Dr. KC. Lalmalsawmzauva, Adviser to CM, Pu Khilli Ram Meena, Chief Secretary, Pu Vanlaldina Fanai, Commissioner, Finance leh Mizoram sawrkar official pawimawh te, Mizoram chhunga bank hrang hrang thuneitute an tel a ni.