Vawiin khan Sinlung Peoples Liberation Army (SPLA) tia invuah mi leh sa 64, thlemsual avanga hun engemaw chen rammu te chu lo haw kirin, vawiin khan anmahni lo lawmna ‘Homecoming of SPLA Cadres’ Vanapa Hall-a hun buatsaihah, Chief Minister Pu Lal Thanhawla chuan nun pangngaia khawsa leh turin alo lawmlut.

 

 

Chief Minister Pu Lal Thanhawla chuan hreawm taka kum 20 chhung rambuaia kan awm hnuah, harsa takin Remna leh Muanna kum 1986 ah kan nei thei hram a. Chutiang ang dinhmuna kan awm tawh hnua vawiina hetiang hun hman a ngai chu pawi atih thu sawiin, Mizoramin remna leh muanna a neih hi tuma tihchhiat kan phal lova, hel tutemah Mizoramah bu khuar tir kan tum bawk lo a, hel tute mah chhawmdawlna kan pe dawn bawk lo, hel hian lukhawng a neilo a ni tih hi tute pawhin kan hriat ka duh a ni a ti. Mizoram hi Indian Republic ah State ralmuang berte zinga mi a ni a, ami cheng hnam hrang hrang te pawh a engahmah inenhranna awmlovin, India khua leh tui diktak kan nih angin inzahtawn leh ralmuang taka kan khawsak tlan hi kan duh ber a ni a ti. Rel kawng siam tur chungchang sawiin, Chief Minister chuan rel kawng siam tur hi tute mahin an tihbuai kan  phal dawn lo a ni a ti a. Rel avanga hnam chimral an awm a hriat ngailoh thu sawiin, chimral hlauhawmna zawk chu Mizoram khua leh tui nilo, nitin inhlawhna hmu reng, mi nuai hnih dawn kan hnena awm rengte (floating population) hi an ni a ti. ‘I thangharh ang u,’ tiin Pu Hawla chuan mipuite a sawm a ni.

Pu Lal Thanhawla chuan kan thalai thlemsual tawkte lo haw kir leh theih nana tha leh zung thawh zawng zawngte chungah leh min duhsaktute zawng zawng hnenah lawmthu sawiin, lo kir lehte nu leh pa te a lawmpui thu a sawi bawk a. Nunphung pangngai an zawh leh theih nan eng engah emaw trainingte pek tum a ni ang tiin, sipai lam pawhin motor khalhte an la zirtir tur thu a sawi bawk a ni.

SPLA a an hotu in Chief Minister hnenah hian silai pakhat a hlan a, Chief Minister hian an zavaiin chibai a buk kim vek bawk a ni. SPLA tobul hi L.Z.Hrangchal in Tuirial leh Tipaimukh hydel project dodal tura Sinlung Tiger Force May 2007 a din atanga rawn piang kha a ni. Lo kirte zinga 53 te hi Mizoram mi an ni a, a bak 11 te hi Manipur mi an ni.

Home Minister Pu R.Lalzirliana pawhin thu sawiin, sorkarin ngaihdam hun chhung a hawn laia SPLA te lo haw kir chu lawmawm a tih thu a sawi a. Lo kir ve lo mi 13 vel, L.Z Hrangchal tiamin an la awm nia a hriat thu a sawi bawk. Pu Zira chuan nunphung pangngai rawn zawh leh duhtu SPLA mi leh sa lo ni thin te chu an chhungte nen hlim taka awm turin duhsakna a hlan bawk a ni.

Inkhawmah hian Ministers te leh Parliamentary Secretaries te an tel tha hle a. Anni bakah hian Major General Shakti Gurung, VSM, GOC 57 Mountain Division, Churachanpur, Mizoram DGP leh DIG Hqrs, 23 Sector Mizoram Range te an tel a ni.