Chief Minister Pu Lal Thanhawla chuan vawiin khan a office chamber ah Central YMA in ruihhlo do beihpui a thlaknaa kalpui mek, SRS (supply reduction service) tanpui nan Rs.3 lakhs SRS Convener Tv. Lalhmachhuana hnenah a hlan a, Congress party ina tanpuina a pek Rs.2 lakhs pawh Chief Minister hian a hlan nghal bawk a ni.CYMA memberte hi President Pu Lalbiakzuala’n a ho a ni.

Chief Minister chuan SRS hmalakna chu sorkarin a hriatpui thu sawiin, an hmalakna chu a fakawm mai nilovin, an ti tha tak zet a ni a ti a. Hna thawh hun bik pawh neiloa, a tul ang zela rim taka an thawhna hian hlawh nei zawka thawkte an kep hneh hle a ni a ti. Chief Minister chuan tanpuina sum a pek chu tul apianga an hman atana a pek a nih thu a sawi bawk.

SRS Convener Tv. Lalhmachhuana, CYMA a Asst Secretary chuan SRS tum ber chu mihring siam that a ni tiin, ruihhlo zuartute zingah Taxi, passenger neilova tlan kuala zuar thin an awm thu leh sorkar hnathawk uniform ha te an awm thu a sawi a. Aizawl leh Zokhawthar inkara Sumo service 83 vel zingah a tam zawk ten ruihhlo an tawlh thin thu a sawi bawk a. Chief Minister Pu Lal Thanhawla chuan hetianga inhnamhnawih Taxi leh Sumo mante chu a Taxi / Sumo permit leh a driver licence tih tawp a ni ang a ti a, sorkar hnathawk mante pawh an chungah dan lekkawh a ni ang a ti.

CYMA President Pu Lalbiakzuala chuan ruihhlo do beihpui CYMA in a kalpui mek chu sorkarin a hriatpui chu a lawmawm tak zet a ni a ti a. An hmalakna a hlawhtlin chhoh zel theihna tura phur taka tanpuina sum an pekah lawmthu a sawi bawk a ni.

SRS hi CYMA in ni 15 April 2015 khan dinin, kumin 2015 vek ni 24 July thla khan hruaitu leh member thar ruat a ni a. Din tirh atanga ruihhlo a man zawng zawng hi Rs.3,75,29,000/- hu a ni. Mihring an man zawng zawng 631 te hi a then police leh excise ah te hlan chhawngin, athen chu counselling pek an ni bawk.

Chief Minister hi Pu T.Sangkunga, MLA & Chairman, Mizoram Youth Commission in a tawiawm a ni.

Attachment

  • Loading attachment...