Department of Agriculture leh a hnuaia Agriculture Technology Management Agency (ATMA) buatsaih, State Level Farmers Meet 2012 vawiina Vanapa Hall-a neih chu Chief Minister Pu Lal Thanhawla chuan a hmanpui.

Chief Minister chuan kuthnathawh hi khawvela hna zahawm leh ropui ber a ni tiin, ei leh bara kan intodelh theihna tura a sulsutu pawimawh ber an ni a, sorkar chu a kawhhmuhtu ve chauh a ni a ti.Chuvangin kuthnathawk tu, loneimite chu an hna theuhah tui tak leh chhuang taka kalpui turin a chah a. Kum 2011 chu sorkarin buh thar tam kuma a puan chu kuthnathawktuten chonaah la in, tlangram loneih pawh 9.57% ah a tlak hniam phah a, buh thar zat pawh 10.05% in a pung chu a lawmawm hle a ni a ti. Chief Minister chuan kuthnathawktute tharchhuah pawh man man zawka hralh anih theihna turin a phurh man tlawm zawk rel kawng pawh Sairang thleng siam tan mek anih thu leh, hun lo la kal zel turah an hmakhua ngaiin Lawngtlai thleng rel kawng siam tura hmalak tum mek a ni a ti.

Farmers Meet a khualzahawm Pu H.Liansailova, Minister for Agriculture pawhin thusawiin, agriculture leh horticulture a hma kan sawn theih nan sorkar chuan a tlachawp nilovin, policy felfai tak siamin hma a la mek a ni a ti a. Tlangram lo neih a tlak hniamna hi kan hlawhtlinna tilangtu pakhat a ni tiin, India Today pawhin agriculture lama Most Improved State lawmman alo hlan tawh thu a sawilang a. Kuthnathawktute chu duhsakna bik dawngtu an nih angin, harsatna awm lova sorkar nen an inpawh zung zung theihna tura Identity Card siam sak anih thu te a sawi bawk a ni.

He Farmers Meet a technical report petu Dr.C.Lalzarliana, Director, Agriculture (Crop Husbandry) chuan Mizorama ram leilet siam theih hectare 74,644 a zau awmah, hectare 12,699 a zau buh chin nan siam anih thu a sawi a.Kum 2011 chu buh thar tam kumah puan anih khan WRC-I ah ram hectare 209 a zau (1.72%) siam belh niin, buh thar pawh 4061 metric tonne (19.61%) a a pun thu leh, kum danga la tih ngai loh WRC-II (terrace) hectare 360 a zau ah buh chingin, 540 metric tonne lai thar chhuah anih thu a sawilang bawk a ni. Heng bakah Oil Palm chungchangte,farm mechanisation te,RKVY te leh ATMA chungchangah te report a pe bawk a ni.

Farmers Meet-ah hian loneimi kuthnathawktu district hrang hrang atangin mi 632 an kal a. Nikum chhung khan loneitute zingah inelna state level leh district level ah siam a ni a. State Level inelna hi best performing district leh farmers award mimal 9 hnenah hlan a ni a. Best Performing district chu Serchhip district niin,certificate leh Rs.50,000/- a dawng a, pahnihna chu Aizawl district - certificate leh Rs.30,000/- leh pathumna Mamit district-certificate leh Rs.20,000/- an dawng a ni. Farmers Award mimal 9 te hnena hlanah hian lawmman Rs.20,000/- leh certificate a keng tel theuh bawk a. Hengte bakah hian District Level inelnaah mimal 456 hnenah lawmman sem a ni bawk.

Farmers Meet inkhawm hi Pu T.V. Fambawl, Secretary, Agriculture in a kaihruai a ni.