Vawiin chawhnu khan  Lal Thanhawla Auditorium-ah ‘Vaihlo tel lo infiamna’ tih thupui atan hmangin state pum huap a vaihlo do ni, 4^th Mizoram State Anti-Tobacco Day -2017 chu Chief Minister Pu Lal Thanhawla  hovin, zirlai te leh sports association hrang hranga hruaitu te  nen hman a ni.

Chief Minister Pu Lal Thanhawla, Mizoram Smokefree Group a Chairman ni bawk chuan Sports Association hrang hranga hruaitute zinga a tam zawk te chu  zuk leh hmuam, a bikin vaihlo leh kuhva khawr kaihhnawihah fihlim hlo te an ni a. An insiam that thuai beisei  a ni a ti. Chief Minister chuan  Mizo mipui te chu, “Ringtu kan nihna angin taksa chhung leh pawn invawn faiah leh zuk leh hmuam a fihlimna kawngah mawhphurhna pawimawh tak neitute kan ni a. Zuk leh hmuam kaihhnawih thila mawhpuh loh theih loh in Chennai, Jaipur leh Delhi-ah te inkhawmna kan hnawng tawh a. Inbih chian a hun tawh tak zet’, a ti.

 "Mizoram Olympic Association(MOA) a president leh Indian Olympic Association a Ex-Officio Vice Chairman ka nihna angin Mizoram sports administrator te zawng zawng zuk leh hmuam, abikin kuhva khawr ei leh meizukah an fihlim ka ngen a. Khawvel changkang zela infiamna hmasawn zelin min kaihhruaina leh min duhdan angin administrator zingah zuk leh hmuam a fihlim lo te an awmlohna tura hmalak zel dan pawh ngaihtuah a la ni leh ang", a ti a. Vaihlo tel lo infiamna chuan infiammi te a let in a ti tha zawk dawn tih a chiang a. Infiammi te zuk leh hmuama an fihlim nan sports administrator ten entawn tur an siam a ngai a ni a ti a. Mizoram mipui nawlpui pawhin hrisellohna kawng hrang hranga hmahruaitu nih chu zahthlak kan tih tlan a tul tih a sawi a.  "Hrisellohna chitin reng min thlen a, kan hmel, kan khawlai te min ti bal tu, vaihlo leh a kaihhnawih te leh kuhva khawr ei leh chinai liah kan sim a ngai", ati

4^th Mizoram State Anti-Tobacco Day -2017 programme hi Pu Lalrinliana Fanai, IAS, Commissioner & Secretary, Health & Family Welfare Department in a kaihruai a. Vaihlo don na campaign thusawi Pi Lal Riliani, President, Indian Society on Tobacco & Health, Mizoram Chapter, Dr. Jane R. Ralte, State Nodal Officer, National Tobacco Control Programme, Mizoram leh Pu VL Bela, Vice President, IST&H, Mizoram Chapter te hnen atanga ngaihthlak a ni a. Pu C.Laltlanthanga, Secretary, Mizoram State Sports Council in vaihlo leh a kaihhnawih laka fihlim tura intiamna leh zuk leh hmuam do kawnga thawk tura intiamna hun a kaihruai a ni.

4^th Mizoram State Anti-Tobacco Day -2017 ah  hian Chief Minister Pu Lal Thanhawla chuan  zuk leh hmuam donna kawnga an awmna huang bika  hmala thaber te lawmman a sem a.  New Life Hospital, Zarkawt, Millenium English School, Zemabawk, Govt. Serchhip College, District Hospital, Kolasib leh Mizoram Amateur Taekwondo Association ten lawmman an dawng a ni.