Lawngtlai Bawrhsap thar Dr Arun T., IAS chuan vawiin khan Lawngtlai Bawrhsap hna a zawm fel a. Lawngtlaia chanchinbumite nen inkawm khawmna hun a buatsaih nghal.

Lawngtlai Bawrhsap Dr Arun T. chuan chanchinbumite chu mipui leh sawrkar inzawmna leilawn pawimawh tak an nih thu sawiin, theih tawp chhuaha thawh hopuiah a sawm a. Sawrkar hma lakna puanzar ngai chi leh mipuite zirtir ngai chi reng rengin mipui hnen a thlen ngei theih nana hma la tur te, ram leh mipuiin an mamawhte thuneitute hnena thlen thin tur te’n a ngen a. A awm chhunga Lawngtlai District-ah a tha zawnga hmasawnna hmuh tur a awm theih nan District Bawrhsap a nih anga a tih tur hrang hrang chu hlen chhuah zel a tum thu sawiin, chanchinbumite chu District chhung chanchin chipchiar taka hria leh mipui nena inngheng reng an nih avangin, a tum a hlen theih nan an thawhpuina, tawiawmna leh finchhuahna a mamawh thu a sawi.

Lawngtlai chanchinbumite pawhin DC thar tha tak lo awm tur chu lawmawm an tih thu sawiin, District hmasawn nan kawng eng kimah thawhpui an tum thu an sawi a. Chanchinbumite’n an tih tur an hlen rualin, sawrkar thuneitu lamin chanchinbumite laka an tih tur pawh tha taka hlen chhuah a nih an beisei thu an sawi bawk.

He inkawm khawmnaah hian Lawngtlai DIPRO pawh telin, inhmelhriatna thingpui an inho nghal a. District hmasawn nana hma lakna tur hrang hrangte an sawi ho nghal a ni.

Dr Arun T. hi Karnataka state-a Mysore khaw chhuak a ni a. Kum 2013 batch IAS AGMUT cadre niin, Kolasib DC atangin Lawngtlai DC-ah hian lo sawn a ni.