4746/2024-2025

Aizawl, the 21st March 2025: Vawiin chawhma khan Mizoram State Legal Service Authority leh All Mizoram Women Elected Representative te tangkawp chuan I&PR auditorium-ah Capacity building & Leadership Training for elected women representatives an buatsaih a. A hawnna inkhawm hi Chief Minister Pu Lalduhoma chuan a hmanpui.

Thu a sawinaah Chief Minister chuan, ram leh khawtlang hruaitu chu dan hnuaia hnathawk tur a ni a, dan a hriat ve a ngai thin. Dan hriatna lama mi a bengvar tawk loh chuan dan kalha thusawi emaw hma han lak mai te a hlauhawm a, mipuite chanvo a humhalhna kawngah te, inrelbawlna lang tlang leh huapzo a kalpui theih nan te a tangkai vek a ni. Hetiang lam training hi Thlan tlin hmeichhiate chauh ni lovin kan za vaiin kan mamawh a ni. Dan thar te a lo chhuak thin a, tun hnaiah pawh dan thar engmaw zat India ramin kan nei. Heng dan thar lo chhuak te pawh hi kan lo hmelhriat ve thuai thuai a tul thin. Vawiinah State Legal Service Authority te nena tangkawpa Thlan tlin hmeichhia ten training in han buatsaih hi lawmawm ka ti hle.

Vawiina thlan tlin hmeichhiate hi kan hmeichhia zawng zawngte aiawhtu in ni a. Hmeichhiate tihchakna leh an hamthatna lamah hmalaknaah pawh sawrkar tibengvartu ni ula a tha. A tulna apianga hma la turin sawrkar hi kan inkau reng a ni, a ti.

A hawnna inkhawm hi Pi R. Zomuanpuii, President, All Mizoram Elected Women Represenratives chuan kaihruaiin kal khawmte lawmna thu a sawi nghal a. Mizoram chanchina dai tawh lo tur, Mizoram state cabinet Minister atana hmeichhia dah hmasa bertu Pu Lalduhoma hi kan chhuang a, a thil tih hian hmeichhiate min tilawm a ni, a ti.

Pu Vincent Lalrokima, MJS, Member Secretary, Mizoram State Legal Service Authority pawhin thu sawiin, an hmalakna chanchin tlangpui a tarlang a, a mamawhtu mipuite tanpui turin kan inpeih reng a ni, a ti.

A hawnna inkhawm hi Pi Florence Vanlanrengpuii, General Secretary chuan lawmthu sawiin a khar a, chawhnu lamah thupui thlan chhuah pali hmanga dan zirhona an nei zui a ni.