4747/2024-2025

Aizawl, March ni 21, 2025: Tukin zing khan (Mizoram Health & Family Welfare Department hnuaia) Mizoram Health Systems Strengthening Project (MHSSP) hmalakna hnuaiah Aizawl khawpuiah Walk for Health Walkathon 2025 - hriselna atana kea kal runpui neih a ni. Natna inkaichhawn theihloh (non communicable diseases) chi hrang hrang dona atan he kea Walkathon hi buatsaih a ni. MLA Pu Lalmuanpuia leh Dr. K. Beichhua te pawh he hunah hian a tel ve a ni.

Tukin walkathon ah hian starting point hmun pasarih - Ramhlun South, Chaltlang Dawrkawn, Chanmari Traffic Point, Sikulpuikawn, Khatla Kawn, Chhinga Veng leh Dinthar NHM Office kawt atangin sikul leh college zirlai, thalai pawl te bakah Health Department thawktute chu dar 6:00 - 6:30 am khan chhuakin, AR Lammual hi an pan khawm a. An intawhkhawmna hmunah hian H&FW Minister Pi Lalrinpuii hovin a kahrna hun hman a ni.

Minister Pi Lalrinpuii chuan thu sawiin, Mizoram leh khawvel ah natna inkaichhawn theihloh natna benvawn a pun chhoh tial tial thu leh heng natna laka fihlim a, a vei tawhte pawh an inenkawlna atana pawimawh em em chu taksa zawisawi a nih thu a sawi a. Ke a kal chu mihring taksa sawizawina harsa lo leh hlawkthlak si, hriselna atana pawimawh tak a nih thu a sawi a, reilote pawh ni se nitin ke a kal chuan nunna pawtsei thei a ni, a ti. Mizoram Health Systems Strengthening Project ten World Bank bultuma hemi kawnga NCD kan tih te leh a dona atana morning walk hlawkthlak zia inhrilhriatna atana Mizoram hmun hrang hranga Walkathon an buatsaih chu lawmawm a tih thu a sawi a ni. Mizoram hmun hrang hranga hma lak a lo nih dan te sawiin, a hlawhtlinna erawh khawtlang leh pawl hrang hrangte, kohhran leh mipui tawiawmna a nih thu a sawi.

Dr. Eric Zomawia, project Director, MHSSP, Pi Navneet Kaur Manchanda, Team Leader, WBTT leh Dr. J. Lalramchhuanga, Sr. Specialist te’n thu an sawi bawk a. NCD te hi kum upa natna anga ngaiht hun ni mahse tunah chuan thalai zawkah te vei an awm mai bakah NCD hrang hrang avanga thih phah hial an tam ta hlem. Natna neih a inenkawl mai nachang hriat a pawimawh thu sawi a ni.

Walkathon kalpui naah District Community Mobiliser (DCM) te ruat niin, an target hlenchhuak tha thlanchhuahte hnenah khuallian H&FW Minister chuan lawmman a hlan a. Lawmman dawngtute chu - pakhatna B. Lalduhsangi, Serchhip district, pahnihna chu H. Vanlalvenzuali, Mamit District, R. Lalmuankima leh Betsy Lalhruaizeli Royte, Lunglei district te an ni. Anni bakah hian district tin Senior CMO te hnenah lawmman pek a ni bawk.

AR Lammual a programme hmanah hian District danga Walkathon an lo hman tawhna video thlirho a ni a. Zaithiam zai te ngaihthlak niin Pu H. Vanlalsanga, Deputy Secretary, H&FW Department chuan lawmthu saiwin hun a khar a ni. Feb ni 15 atang district heng hrangah lo neih tawh. Khaw 509 atangin mipui 70,000 bawr vel walkathon pual hian an lo kal tawh a ni.