1770/2023-2024

Aizawl, the 6th September, 2023: Trained Nurses' Association of India (TNAI), Mizoram State Branch General Conference vawi 19-na, September ni 6-7, 2023 chhung awh tur bultanna Synod Conference Centre, Mission Veng, Aizawla hman chu vawiin khan Chief Minister Pu Zoramthanga chuan khuallian niin a hmanpui. General Conference thupui atan 'The Future of Nursing: Leading Change, Advancing Health and Transforming Care' tih chu hman a ni.

Khuallian Chief Minister Pu Zoramthanga chuan TNAI Mizoram State Branch General Conference vawi 19-na hmang tura hmun hrang hrang atanga Nurse kalkhawmte chibai bukin, Nurse-te hnathawh chu ropui a tih thu leh ram mipuite hriselna kawnga tha thawhtu tangkai leh pawimawh tak an nih thu a sawi a. Nitina an hnathawhna leh eizawnna piah lam thil dangah nurse hmingtha leh chhuanawm tak tak an awm thin chu ropui a tih thu sawiin, nurse-te chu an eizawnna leh hnathawh a nih mai bakah mihring puite rawngbawlna a ni tih hriaa, damlo anmahni pantute hmangaihna nena enkawl zel tur leh tha taka dawngsawng thin turin a chah a. Mizoramin tunhnaia harsatna hrang hrang a tawhte tarlangin, harsatna tawhte chu tanlakna petu ni zel se a duh thu sawiin, kalkhawmte chu harsatna an tawhte hneh thei tura theihtawp chhuah turin a fuih a. Sawrkarin Health Care System tih changtlun kawnga hma a lak dante tarlangin, Nursing Directorate siam thar a ni chu a lawmpui thu a sawi a. TNAI Mizoram State Branch-te an kalzelna turah duhsakna a hlan a ni.

Thusawitu dang Pi Evelyn P. Kannan, Secretary-General, TNAI Hqrs. New Delhi chuan Mizoram Nurse-te zingah thawhhona tha tak a awm chu fakawm a tih thu sawiin, chhawmnung zel turin a chah a. Trained Nurses' Association of India (TNAI) chu kum 115 a upa, Branch 34, member 5,00,000 leh Zirlai member 2,31,303 nei mek a nih thu sawiin, an hmalakna a sawifiah bawk.

He hunah hian Pi Zarzokimi, EC Member-in hunserh a hmang a. Pi C.Susan Dkhar Tada, Vice President, TNAI North East Region, Pi Lalchhanhimi, Joint Director, Nursing & EC Member leh TNAI Mizoram State Branch President Pi Lalremmawii te'n thu an sawi bawk a. Thupui sawizauna Pi Christina Zothanpuii, EC Member-in a nei a. Secretary Pi Lalrinhlui hnen atangin report ngaihthlak niin, Vice President Pi Lalfamkimi'n lawmthu sawiin hun hman a khar a ni.

He hunah hian Conference hnuhnung ber 2019 hnu lama Florence Nightingale Award dawngtu Nurse 4; Pi Dengthangpuii (L), Health Supervisor (Rtd), Kulikawn, Aizawl, 2020; Pi Vanlalthuami, Health Worker, Lunglei Theiriat, 2020; Pi Vanlalrovi, Staff Nurse, Thingsulthliah PHC, 2021; Pi C.Zopari, Ward Superintendent (Rtd), Civil Hospital Aizawl, 2023 te hnenah Chief Minister-in chawimawina thilpek a hlan a. TNAI Hqrs. atanga lokal Official-te leh Mizoram Branch OB leh EC Member-te chawimawina thilpek hlan an ni bawk.

Chawhnu lamah hun hman chhunzawm niin Member boralte sunna hun hman a ni a, rorel inkhawm neih niin, report hrang hrang ngaihthlak a ni bawk. Ruahman dan chuan naktuk hian inzirtirna hrang hrangte neih a ni ang a, hruaitu thar an thlang nghal dawn a ni.

Trained Nurses' Association of India (TNAI) hi kum 1908 ah din niin, Mizoram State Branch hi August 1964 ah din a ni a, September ni 1, 2023 thleng khan Mizoramah TNAI Life Member 3750 an awm a. District branch 7 awm mekin TNAI Mizoram Office dinna tur ram Ainawn Vengah TNAI Hqrs-in a leisak bawk.