1771/2023-2024

Champhai the 6th September, 2023 - Champhai North bialtu MLA & Vice Chairman, H&FW Board Dr ZR Thiamsanga chuan vawiin khan Champhai Higher Secondary School, Vengthlang North-ah ‘Grants under Proviso to Article 275(1)’ sum cheng nuai 462 kaltlanga ruamhan tur ST Girls’ Hostel sak tur lungphum a phum. Champhai Higher Secondary School hi Champhai Town Multipurpose Co-operative Society Ltd (CTM-PACS) hmalaknaa din a, enkawl niin, ST Girls’ Hostel hi school compound chhungah hian sak tur a ni a, CTM-PACS hian a sak hna hi an thawk dawn a ni.

CTM-PACS-te hian Manipur buaina tuar mek Zohnahthlakte tanpuina atang cheng sing thum (Rs.30,000/-) MLA hnenah hian an hlan a ni.

Hemi puala inkhawm tawi Pu HS Vanlalfakzuala kaihhruaiah Dr ZR Thiamsanga chuan Champhai Higher Secondary School zirlaite tan ST Girls’ Hostel ruahman a ni tur chu lawmawm tiin, he ruhrel pawimawh tak hian zirlaite nunah leh an zirna kawngah hmasawnna tam tak a thlen ngei a beisei thu a sawi a. Champhai District-ah zirna a hmasawn zel theihnan sawrkar chuan theihtawp chhuah zelin tun hnaiah MYC Coaching Centre leh Champhai Nursing School te hawn anih thu a sawi a. Hemi bakah hian Champhai Medical College leh MZU Eastern Campus te la din turin hmalak zel a tum thu Champhai North bialtu MLA chuan a sawi a ni.

A sawi zelnaah Vice Chairman, H&FW Board chuan Covid-19 hrileng avanga harsatna nasa tak kan tawh hnuah Mizoram chuan harsatna khirh tak tak engemawzat - lirnghing, vawk hri leng, ramri buaina, Myanmar leh Manipur buaina avanga raltlante buaipui chhoh a ngai a. Heng harsatna leh buaina te chingfel tur hian sawrkar chuan tih takzet in hna a thawk a, Covid-19 hmachhawn kawngah pawh India rama thawk tha berte zinga mi kan ni a, NITI Aayog Health Index-ah pawh India ram State te te zingah dinhmun tha tak kan luah a, Myanmar leh Manipur raltlan mi thahnem tak kan enkawl a, ramri buai chungchangah pawh huaisen takin sawrkarin hma a la a ni tiin, Sawrkarin theihtawp a chhuahna chu mipuiten lo hriatpui tura ngenin, thawhho puiah a sawm a. Zirlaite pawh ram leh hnam chungchang ngaihven a, nationalism thinlung an put chhoh ve a tul thu sawiin an thiamna leh an theihna te khawtlang hmasawnna atana hman tum zel turin a chah a. Champhai Town Multipurpose Co-operative Society Ltd (CTM-PACS) te khawtlang tana an hnathawh a ropui a tih thu sawiin, an hmalak zelna atan duhsakna a hlan a ni.

Vawiin program-ah hian Pu HT Lalrokhuma, Treasurer CTM-PACS chuan Report a pe a, Pu Lalthanpuia, CTM-PACS chuan lawmthu sawina hun a hmang a ni.