1772/2023-2024

Aizawl 6th September, 2023: Vawiin chawhnu dar 2 khan H&FW Minister Dr. R Lalthangliana, YMCA North East Regional Chairman ni bawk chuan a Office Chamber, MINECO- ah August 27 - 29, 2023 a 1st All India Inter YMCA Futsal Tournament 2023 buatsaiha pahnihna dinhmun hauhtu YMCA (Young Men's Christian Association) Aizawl Futsal Team-te thingpui inhona buatsaihsakin inkawmhona hun an hmang.

Dr. R. Lalthangliana chuan Christian ram kan nih angin India ram pum huap Futsal tournament buatsaih a first runners’ up dinhmun Aizawl YMCA futsal team te'n an luah thei chu lawmawm a tih takzet thu a sawi a, team squad member-te chu an nun uluk a, Christian nungchang mawi tak nena an taksa vawng zui zel turin duhsakna a hlan a. India ram pum huap tournament-ah pawh hetiang dinhmun sang kan naute’n inhauh thei chu Pathian thiltihtheihna vang a ni tih hrereng turin players-te a chah. Midangte entawn theih turin Christian nunze mawi an nunah tilang zel turin a chah bawk. Minister hian YMCA member-te tana hamthatna hrang hrang sawiin khawvel hmun tinah zin mite tan thlenna in tlawm tak bakah ei leh in a thlawna buatsaih thin a nih avangin vawiina programme-a tel zawng zawng leh Mizoram Christian pawl hrang hrang thalaite CYMA-ah hian member ni turin a sawm nghal a ni.

YMCA member hi form fillup hnuah cheng 200/- chawiin kum hnih chhung member a nih theih bakah cheng 5000/- pein life time member a nih theih bawk a ni.

YMCA Aizawl futsal squad-ah hian mi pariat awmin Lalrammuana chu player–cum-coach a ni a, an zin kawng leh tournament an khelh dan tlangpui report a pe a. Pu Shamir J. Thabah, YMCA North East Regional Secretary pawhin he hunah hian thusawiin Aizawl YMCA team-te chungah lawmthu sawiin Minister hnenah hian lawmpuina thilpek a hlan nghal a ni.

Vawiin lawmpuina programme tawi hmanna-ah hian Pu K. Laldawngliana, MLA, Jt. Secretary, Er. K. Lalsawmvela, Adviser to CM (technical), Hon. Secretary YMCA, Pu Joe RZ Thanga, YMCA National/NER Committee member-te bakah sawmbikte an tel a ni.