1773/2023-2024

Lawngtlai dated 6th September 2023: Vawiin chhun khan Lawngtlai Press Club, Electric Vengah Pu Hmingthanzuala, District Information & Public Relations Officer leh Mizoram Journalist Association, Lawngtlai district member-te chuan inkawmna hun neiin Lawngtlai district-a thutharthehdarh kawng a thawhho dan tur an sawi ho a ni.

Pu Hmingthanzuala, DIPRO Lawngtlai District chuan thutharthehdarh hna chu hna hautak leh inpekna thuk tak ngai a nih angin ram leh hnam tan a rawngbawlna anga ngai chung a thawh a tul thu a sawi a. Khawvel changkanna ina a ken tel Media Platform hrang hrang hmanthiam a tul thu leh mipui nawlpui tan a thil tangkai leh chhawrtlak thehdarh tam a pawimawh thu a sawi a. MLA inthlanpui kum anih angin mahni duhthlanna dik hmang tur a mipui zirtir kawng ah te, Vote thlak ngai pawimawh tur a inzirtir tam a pawimawh thu DIPRO chuan sawiin inthlanna felfai leh langtlang kalpui a nih theih nan inthlanna buatsaih kawng a mawhphurtute chu theihtawp a thawhpui zel turin a chah bawk a ni.

Hun kaihruaitu Pu Lalngheta Ralte, President, MJA Lawngtlai District chuan inhmelhriattirna hun te neiin MJA hnathawh dan hrang hrang tarlanna hun a hmang a. Lawngtlai district-ah MJA member 10 leh nitin chanchinbu chhuak 5 a awm mek thu te, MJA member leh an chenpui te hriselna enkawl kawng a hamthatna ruahman a nih dan te, Lawngtlai District MJA Pension Scheme kalpui a nih thu leh mipuite tan Chanchinbu kaltlang a thu rintlak leh belhchiandawl chauh chhawpchhuah a nih theih nan Media Campaign & Journalist Workshop buatsaih a nih thin thu te a tarlang a ni.

Vawiin thutkhawmnaah hian Electronic Media hman tangkai theih dan te, Sawrkar advertisement kalphung te leh Election kaihhnawiha a tulna apiang a mipui zirtir tur a thawhho dan tur te sawi a ni bawk.