Mizoram sorkar leh UNO project intawm, UN Joint Initiative atana thawktu UN Agencies 4 - FAO, ILO, UNDP leh UNIDO te hna thawhna tur UN Joint Initiative office chu vawiin khan Chief Minister Pu Lal Thanhawla’n Directorate of AH& Vety building, Khatla ah a hawng.

Pu Lal Thanhawla chuan kalkhawm hmaah thusawiin Mizoram sorkar leh UN Agencies 4 ten thawhhona siam a, Mizoram hmasawnnan an thawk ho tak tak dawn ta chu lawmawm tiin, sorkar-in theih tawpin an hnathawhna ah a tul ang angin a pui dawn tih a sawi.

Chief Minister chuan Mizo mipui tan Mizoram sorkar chuan UN team te nen thawk hovin ei leh bar a intodelhna, ranvulh leh thil dangah hmasawnna a thlen ngei a beisei thu a sawiin, UN mithiamte hmalakna tur chu nghakhlel takin kan thlir a ni, a ti.

India rama UNO hotupa Pu Louise Georges Arsenault a chuan Mizoram chu India ram kilkhawr bera awm ni mahse ram nuam, ralmuang leh boruak thianghlim tak anih thu sawiin, theih tawpa UN Agencies ten hma an sawn theih nan hna an thawh tur thu sawiin, ram nuam mai bakah a mipui literacy lama India rama sangber pakhat, kawmnuam tak an nih avangin hmalak pawh a chakawm lehzual a ni, tih a sawi.

Pi Ayumi Fujino, UNIDO Representative pawhin kum 2013 atanga hma an lo lak dan te, kum 2014 a MoU an ziah dante leh tunah hnathawk tak tak tura office hial hawn a ni thei chu lawmawm a tih thu a sawi bawk.

Pu P.L. Thanga, Member & Secretary, Mizoram Planning Board leh Vice Chairman NLUP Implementing Board nibawk chuan inkhawm kharna hun hmangin mumang lama an lo man thin UN leh Mizoram sorkar thawhhona tur chu vawiin ah a tak a thleng ta chu lawmawm tiin thawktu zawng zawngte chungah lawmthu a sawi.

Tarlan tawh thin angin Joint UN Initiative atan hian Mizoram Sorkar leh UN Agencies 4 - Food & Agriculture Organisation (FAO), International Labour Organisation (ILO), United Nations Development Programme (UNDP) leh United Nations Industrial Development Organisation (UNIDO) te chuan 16.10. 2014 khan thuthlung an ziak tawh a. He thuthlung hnuaiah hian Mizoram sorkar leh UN Agencies te chuan Mizoram ecosystem vawnhimna tura ruahmanna tha zawk buatsaih te, agriculture leh horticulture thlai bakah ramhnuai thil thar chhuah thenkhat hralhna tura market zawn leh eizawnna kawng hawn belh tura kut hnathawktute training pek leh an thiamna chher hriam sak kawngah te hma la dun turin inremna an ziak a ni. UN Joint Initiative atan hian Champhai leh Lunglei district chhunga khaw thlan chhuah thenkhat ah insawr bingin hma lak a ni dawn a. Hetah hian UN Agencies 4 te chu Mizoram sorkar hnuaia Environment & Forest, Agriculture, Horticulture, Labour & Employment, Trade & Commerce, Industries leh Vety & Animal Husbandry Department te nen an thawk ho dawn a. Heng district 2 a khaw thlan chhuah ah te hian Village Council te leh kut hnathawktu mimal leh pawl hrang hrang te chu training leh a taka enchhinna neihpuiin ziritirna tha ber neihpui an ni ang a. Heng district pahniha hmalakna ang hi state pumah Mizoram sorkar-in a kalpui chhunzawm dawn a ni.

UN Joint Initiative hian hlawm thumin heng thil pawimawh tak tak te hi a tin zawn a : (i) Ram leilung, boruak, thing leh mau leh nungchate inlaichinna humhalh tura sorkar hnena thiamna pek belh; (ii) Agriculture leh a kaihnawih eizawnna peng dang atanga tharchhuah tihpun leh hemi kawngah hian abika hmeichhiate ngaih pawimawh; (iii) Thar chhuah hlutna tipung tura thil sawngbawlna leh market thlunzawmna tih changtlun te a ni. UN Agencies hrang hrang ten ngaih pawimawh leh tinzawm bik neia hma la in FAO chuan ei leh bar thar chhuah tihpun leh eizawnna tih hmasawnna tur kawngah Horticulture, Forest, Agriculture leh Soil & Water Conservation te nen hma an la ho ang a. Abik takin vawk natna (PRRS) leh ran natna khuahkhirh leh enkawl chungchanga hma thar lakna tur pawh a tel bawk a ni. Eizawnna kawng hawn belh a, ram hmasawnna tichak turin ILO chuan awmze neia hnathawktute tha chhawr tangkai a, hnathawktu te thiamna tipung tur leh a tul anga training pe a, kawng kawhmuh turin hma a la dawn a. UNDP chuan Agriculture thlai thar hmanga sumdawnna atan market inthlunzawmna tur lam bitum in hemi atana a inkhaidiat a capacity building hmalakna lam a ngai pawimawh dawn a. Hetih lai hian UNIDO chuan mau hmanga thil siam chhuah te leh mau sawngbawlna industries tih hmasawnna lam a buaipui thung dawn a ni.

Mizoram sorkar tan an hnathawhnan UN Agencies 4 (pali) te chuan US $ 4000000 a rawn thawh a, a tul dan angin hei hi pek belh theih a ni dawn bawk a ni.

Heng UN Agencies te hian hmarchhak bial state dangah te hma an lo lak tawh atangin an tawn hriat leh thiamna te Mizoram ah an rawn seng lut dawn a. An hmalakna hrang hrang te hian hmarchhak bial in ang khata harsatna kan neih heng - ram leilung hausakna hmanzai leh thingtlang miretheite tan eizawnna tam zawk siam belh te; horticulture thlai tharchhuah tihpun leh ran natna inkaichhawn chungchanga harsatna sutkianna tur te; kut hnathawktute hnena sumdawnna hawi zawnga training pek leh thiamna pek belh te leh sorkar, mimal leh kut hnathawktu pawl hrang hrangte thiamna tihpun a, thar chhuah tihralna tur leh market thlunzawmna tur ruahmanna tha te hi a keng tel a ni.

Nizan lam khan Chief Minister chuan UN Team tan Cultural Programme leh zanriah a siam sak a an hlim hle.

Attachment

  • Loading attachment...