Vawiin khan Lawngtlai DC Conference Hall-ah National Urban Livelihood Missions hnuaia Self-Help Group member te tan training buatsaih a ni a. A hawnna inkhawmah Additional DC Pu R. Lalsangluaia chu khuallian a ni.

Khuallian chuan Self-Help Group member kalkhawmte chu an talent dawn te, a te emaw a lian emaw, hmusit mai lova; a tipung tu ni zawk turin a chah a. Mahni hnathawh hmusita ngainep thinte an dingchang ngai lo a ni, a ti. Hmasawnna rahbi sang zawk kan rah theihna tura min thlangtu leh min tanpuitute lungawina khawpa thawh theuh tum tur leh chutiang mi ni thei tura hriat tur tul awm apiangte chu training chhunga hriatfiah tum turin a chah a ni.

Training kaihruaitu Pu Lallawmawma, MCS, SDO Sadaar Lawngtlai chuan National Urban Livelihood Missions hnuaiah hian chi peng (components) hrang hrang a awm a, vawiina training nei tura thlante chu Employment Through Skill Training and Placement hnuaia Group 28 te atangin an ni a ti a, member kal tam ber te chu Puanthui (Tailoring) an nih thu a sawi bawk. Vawiin hian Group 27 te hnenah an bultanna tur tanpuina (Seed Money) chu bank account ah an thun sak nghal dawn bawk a ni.

Self Help Group member kal khawmte hi Pu Lalramliana Ngente, Programme Development Cooordinator, World Vision India leh Pu Lalsawmliana, Chiefr Manager, Mizoram Rural Bank ten zirtirna an pe a, member kal khawm ten an hriat duhzawngte an zawhna hun pawh siam sak zel an ni bawk. Training ah hian mi 160 vel an kalkhawm a, naktukah member dangte tan training hi buatsaih chhunzawm leh tur a ni.