Chief Minister Pu Zoramthanga chuan Civil Aviation Minister of India leh Ministry of Housing and Urban Affairs changtu Pu Hardeep Singh Puri chu a pisa ah a kawm.

New Delhi-a cham mek Chief Minister chuan Union Minister chu Mizoram mamawh hrang hrang a sawipui a. Aizawl khawpui tana Revised Smart City Plan chu pawmpui thuai turin leh, Aizawl khawpui traffic tawt lutuk tizângkhai tura Vaivakawn leh Bawngkawna kawng chhawng siam chungchang te, Chaltlanga Inter-state Bus Terminal din chungchang te an sawi dun a. CM chuan Mizoram chu India Hmarchhak state zinga North Eastern Region Capital City Development Investment Plan (NERCCDIP) hnuaia hnathawk tha ber a nih thu leh Mizoram tan mai ni lo Hmarchhak state te tana Gross Budgetary Support Scheme pawh chhunzawm zel nise a duh thu a thlen bawk.

Chief Minister chuan Lengpui Airport chu Rural Connectivity Scheme (UDAN) hnuaia telh tur te, khualzin phur thlawhna bakah bungraw phur thlawhna service tir chungchang te, Lengpui Airport tihchangtlun chungchang te, Lengpui leh Kolkata inkar thlawhna chuan man to bik te leh Helicopter service tam zawk neih a tul thu te a thlen bawk a. Union Minister chuan hengte hi a lo enzui tur thu leh hma a lo lak tur thu a sawi.