45/2025-2026

Buangpui the 4th April 2025: Vawiin khan Tuirihiau Run, Buangpuiah Vantawng Group YMA chuan Inkhawmpui vawi 26 na, vantlang inkhawm an buatsaih a. Bialtu MLA Pu Lalduhoma, Chief Minister, chuan chawhma inkhawm a hmanpui a. Pu B. Lalchhanzova, Minister chu khualzahawm a ni.

Thu a sawinaah Chief Minister chuan, Vantawng Group YMA te duhsakna chibai bukin, duhsakna a hlan a. A theih tawp chhuahin a bial tan hna a thawk zel dawn tih a hrilh. A bial tana hma a lakna thenkhatte pawh tarlangin; Thenzawl damdawiinah Ultrasound leh Serchhip damdawiinah Dialysis khawl dah thar a nih tur thu sawi a. Chief Minister bial a nih vanga duhsakna ni chuang lovin, a tulna vang zawka Thenzawla PWD Division dah thar sawrkarin hma a lak thu leh Vantawng khawhthlaa Rope Way siam thuai an tum thu a tarlang bawk.

Muanna Khawpui (peace city), mipui nuaih sawm vel chenna tur Thenzawl leh a chhehvela dinna tur  Prime Minister Pu Narendra Modi hnena ka dil hi kan hmuh theih a rinawm chho zel a. 16th Finance Commission ah pawh ka lo sawi a. Tunah hian Ministry of Housing and Urban Affairs (MoHUA) chuan master plan siamna tur cheng vaibelchhe sawm min rawn phalsak a ni. Hun erawh a la duh deuh ang.

Sawrkar chuan ram hmasawnna hi ngaipawimawh ber mah se mipuite chhungril nun (moral) a chhiat si chuan hmasawnna tluantling a ni theiin kan hre lo va. Chuvang chuan mipui sukthlek siamna (moral reformation) keng tel hmalakna kan kalpui nual tawh a. Kan la kalpui zel dawn. Minister zingah eiruk ching an awm sawi tur a awm lo va, a thlawna dawn beiseina thinlung pawh kan ti reh chho mek a, sawrkar hnathawkte chu hun vawng dik tura beisei tlat an ni. Ruihhlo dona kawngah pawh kan tha kan thlah dawn lo.

Kan thalaite nun tihchhiatsaka, naupang te tea an boral pawh pawi ti map lo, ruihhlo zuar te hi kan ngai thei lo va. Kan en liam mai mai dawn lo. Tun hnaia Drugs tam tham tak mantu Sub Inspector Zirthanga pawh kha vawiinah ka bia a, a thawhpuite nen chawimawina kan hlan dawn a ni. 

Mipuite nun kawng siamthatna leh khawtlang nun venhimna kawnga kan thawhpui pawimawh ber chu YMA te hi in ni a, mawhphurhna sang tak in chelh tih lo hre reng ang che u, tiin YMA te hi a chah a. Inkhawmpui hlim leh nuam tak hmang turin duhsakna a hlan.

Vawiin vantlang inkhawm chawhma hun hi Pu Chawngsangliana, Vice President, VTG YMA in a kaihruai a, Pu C. Biakhlimpuia'n hunserh a hmang a, branch YMA ten zaipawl intihsiak an nei bawk. Chawhnu lamah pawh inkhawm hi neih zui a ni a. Chawhnu hunah hian khualzahawm Pu B. Lalchhanzovan thusawina hun a hmang.

Vantawng Group YMA ah hian branch 13 an awm a, member hi 7523 an awm. Inkhawmpui leh inkhawmpui inkarah an member 62 an boral a, an member boral te hi nimin rorel inkhawmah sunna an lo nei tawh a ni.