Chief Minister Pu Lal Thanhawla chuan YMA General Confernece vawi 64-na Darlawn Chalhfilh Runa hman mek chu nimin khan a hmanpui.

 

 

Chief Minister chuan YMA nen a sorkar chu thawhhona tak an neih thin thu sawiin, tun tumah pawh hian Budget Session lai nimahse a sorkarin an ngaih pawimawh avangin a rawn tel a ni a ti a. Tualchhung inpuahchahnate pawh ropui a tih thu sawilangin a Mizo hle a ni a ti. Pu Lal Thanhawla chuan Zoram hi Zohnahthlak zawng zawng te inpui ber anih thu sawiin, inpumkhatna tha kan neih theih nan Lusei tawng kan thiam a ngai a, Mizo nih hreh tur a nilo a ti. Kan unau Paite, Kuki leh Hmar ten hmundangah harsatna tawkse Mizoram hi an rawn tlanchhiatna a ni a, keini nu leh pa tiin kan lo dawm a tul thin a ni a ti a. Lusei tawng pawh an thiam mahse pawnlamah an kal a an thiam leh duh lova, Mizo nih an duh leh bawk silo. Hetiang anih avang hian tualchhung mi te tan lo dawnsawn dan thiam a har em em thin a ni a ti.

Pu Lal Thanhawla chuan nitin eizawnna kawngah kan taimak a, mite thawh ang kan thawh peih a tul thu a sawi a. Mizoramah  kan khua leh tui nilo mi nuai hnih vel nitin inhlawhna hmu reng an awm thu sawilangin, tualchhung mi ten hna thawh tur avang kan tih thin hi kan inbihchian angai a ni a ti. Eng hna pawh hi eizawnna tling anih phawt chuan hna zahawm a ni a ti. Kan unaute dang inti Mizo duh silo, kan thau sawhthlak tum reng an awm a ni tihte kan hriat a tul thu sawiin, tualchhung mite bawk hi in enfiah angai a ni a tiin, thanharh a hun a ti.

Chief Minister chuan Mizo te zingah ram leh khawtlang dah hmasa lova mahni inngaihtuah hmasa kan la tam lutuk hi siam siam that a ngaih thu sawiin, mitin hi full time kristian worker ni thei vek lo mah ila, kan hnathawhna theuhah full time kristian kan ni thei a ni a ti a. Chuvangin tute pawh hi engtik hunah pawh lepse kan ngam tur a ni a ti. Biakin leh pulpita kristian tha tak niha, mahni hnathawhna hmuna kristian tha nih leh silo te hi a zahthlak a, kan insiam that a tul a ni a ti.

Nizan inkhawmah hian la tih ngailoh, mi harsa bik, Champhai bul Leisenzo khuaa cheng Pu Vungzagin te chhungkaw tanpuina thawhlawm khawn a ni a, Rs. 34,900/- hmuh a ni.

Nizana Palai riak tur kal zawng zawng chu 3215 an ni a, langa kal 400 an awm bawk. Nakum Conference thlengtu tur atan Lunglei thlan a ni.

Chief Minister hi a nupui Pi Lal Riliani bakah Pu S.Laldingliana, Parliamentary Secretary, Pu PL Pianmawia, Govt Dy. Chief Whip leh Pu Joseph Lalhimpuia, Vice Chairman, High Power Committee, Lunglei ten an tawiawm a ni.