National Council of YMCAs of India buatsaihin ni 3 awh tur VII National Women's Assembly chu nimin khan Art & Culture AudItorium, Berawtlang-ah neih tan a ni a, Mizoram Chief Minister Pu Lal Thanhawla chu Khuallian niin Assembly hawnna inkhawm a hmanpui a ni. He inkhawmpuiah hian NE Region of YMCAs Chairman Dr.R.Lalthangliana chu Khual Zahawm a ni a, YMCA National Gen. Secretary Pu John Verughese chu Special Guest nihna a chang bawk. Assembly hawnna inkhawmah hian Most Rev. Bishop Stephen Rotluanga'n hunserh a hmang a ni. VII National Women's Assembly thupuiah chuan 'Ending Inequity : Equal Rights, Equal Opportunities - Progress for All' (Mipa leh Hmeichhe kara inthlauhna kalsana, a ruala hmasawnna lam hawia ke pen) tih hman a ni.

Khuallian Pu Lal Thanhawla chuan India ram state hrang hrang atanga palai lo kalte lawmna thu sawiin Mizoramin hmarchhak biala YMCA Inkhawmpui lian thleng thei hmasa ber a nih chu vanneihthlak a ni, a ti a. YMCA chu khawvel puma Kristian zawng zawngte huap pawl a nih avangin Kristiante inkara inunauna siam tura pawl pawimawh leh thawh hlawk tak a ni, a ti. Mizoram chu sakhaw dang 3 - Hindu, Buddhist leh Muslim - ten an hual chungin Pathianin chanchintha missionary-te hmangin a rawn pe a, chuvangin Mizote tan chuan ram chhung chauh ni lovin ram pawn thlenga chanchintha puanchhuah hi chona leh kohna a ni tak meuh a ni, a ti bawk. Hmeichhe dinhmun chawikan zel a ngaih pawimawh thu sawiin Khuallian chuan India rama hmeichhiate dinhmun pawh zawi zawiin hma a sawn zel a, tunah chuan President leh Speaker te hial pawh hmeichhia kan nei ta a, hei hian India rama hmeichhia ten kawng engkimah an chanvo dik tak an hmu tan chho zel tih a entir a ni, a ti. Kohhran huang chhungah pawh hmeichhiate tun aia nasa leh zuala rawngbawlna lamah hman tangkai a beisei leh a duh thu a sawilang bawk.

Khual Zahawm NE Region of YMCAs Chairman Dr.R.Lalthangliana pawhin thu sawiin rampumah hmeichhiaten hmasawnna kawng hrang hrangah nihna leh chanvo pawimawh tak tak an chelh mek chu lawmawm a tih thu a sawi a. Women Reservation Bill chuan hmeichhiate tan kawng thar a rawn hawn thu sawiin Dr.R.Lalthangliana chuan India ramah mipa 1000 zelah hmeichhia 933 an awm a, hmeichhiate chawikanna lam thlahthlam a nih chuan ram leh khawtlangah hmasawnna pawh a kal chak thei lovang, a ti. Hmeichhiaten sorkar leh industry-ah te dinhmun pawimawh tak tak an rawn chelh chho mek chuan ramchhungah mipa leh hmeichhe kara inthlauna pawh a reh tial tial a ni tih a entir a ni, a ti bawk.

Special Guest YMCA National Gen. Secretary Pu John Verughese chuan YMCA National Council aiawhin palai kalkhawm zawng zawngte lawmna thu a sawi a, YMCA National President thuchah a chhiar chhuak bawk. YMCA National Council hnuaia peng hrang hrang zingah hmeichhia leh naupangte hamthatna lam ngaihtuah tura din Department of Women Empowerment & Child Concerns chu a thawk tha leh chak ber pawl a ni a ti a. Hei hian hmeichhiate hnathawh rim zia, taimak zia leh rinawm zia a tilang chiang hle a ni, a ti. National Assembly thleng thei tura Aizawl YMCA ten theihtawp an chhuah avang leh hneh taka palaite an enkawl avangin lawmthu a sawi bawk.

Nimina tan tak YMCA VII National Women's Assembly hi Aizawl YMCA President Pu P.C.Zoram Sangliana'n a kaihruai a. India state hrang hrang atangin palai 31 an rawn tel a ni. YMCA hnuaia National Women's Forum President Dr.Ann Thomas pawh he Assembly-a telin India hmun dangte aiin hmarchhak bialah hmeichhia te tihchangkanna leh hmasawnna tura programme hrang hrang chu a tak taka hman a nih thu leh hmeichhiate dinhmun pawh a that zawka a hmuh thu a tarlang a ni.