Mizorama Land Reforms Operation thawhkhatna atan Family Land Record Operation (mimal inhmun lo ram chhinchhiahna) hawnna inkhawm chu Revenue Department leh Central YMA tangkawp chuan Central YMA Hall, Tuikhuahtlangah vawiin nileng khan an hmang. He inkhawmah hian Revenue Minister Pu J.H. Rothuama chu khuallian niin, Pu RL Rinawma IRS, Commissioner Revenue Deptt. chu khual zahawm a ni.

Minister chuan Land Reforms pawimawhzia sawiin tuna kan ram bak hi Pathianin min pek belh dawn loh avangin keimahni leh thangthar lo la awm tur te tana kan humhalh a tul thu sawiin, he Land Record hian mihausa leh pamham te'n kan ram an neih zawh vekna tur daltu leh ram mi dik tak chauh te tana Mizoram kan humhalh theihna tur hmanrua a ni a ti a. Hemi atana YMA, pawl lian leh chak takin Revenue Department thawhpui a remti chu lawmawm a tih thu a sawi. Chhiah chi hrang hrang (leiman, Electric Bill, Tui  Bill leh a dangte) awlsam taka mipuiten a ruala hmun khata kan pek theihna tur ruahman mek a nih thu a sawi bawk.

He inkhawmah hian  khualzahawm Pu R.L. Rinawma IRS leh Pu Lalbiakzuala, General Secretary CYMA  te pawhin thusawina hun an hmang a. Chawhnu lamah Family Land Record Operation atana zirtirna chu Pu V Lianzinga, Pu Dawngkima leh Pu Rinzamlova ten kalkhawmte hnenah an pe.

Aizawl District a YMA Group pasarih atangin Branch tin aiawh mi 94 an kalkhawm a, khawchhung branch hrang hrang aiawh mi 76 an tel bawk.