1375/2026-2027

Aizawl the 13th July 2026: Vawiin khan Chief Minister Pu Lalduhoma chuan Dawrpui Multipurpose Hall-ah Tribal Cooperative Marketing Development Federation of India (TRIFED), Ministry of Tribal Affairs, Government of India leh Mizoram sorkar Cooperation Department tangkawpte buatsaih Hapta khat awh tur Zo fair (Aadhi Bazaar) a hawng.

He Bazarah hian India Hmarchhak state hrang hrang leh Mizoram hmun hrang hrang atanga kalkhawm kutthemthiamten an thilsiamte an pho chhuak a ni.

A hawnna thu sawiin Chief Minister chuan, hmarchhak mipuite hian Lehkhabua kan history-te ziaka kan dah hma daih atang tawh khan kan puantahah te, kan thiamhnangdehahte kan chanchin hi kan lo ziak kai tawh a. Vawiina he Bazara kan thil pho, kan kutchhuakte kan en hian, kum za tam tak chhunga kan lo inhlanchhawn tawh themthiamna leh kan nunphungte kan hmu tel a ni. Khawvel changkanna avangin khawl hmangin hmanraw tam tak kan dekchhuak tawh a. Nimahsela, heng kan hnam thil, kan kutchhuakte erawh hi chu vawiin thlengin kan dehchhuah dan a la ngai reng a. Kan hnam zia (identity) kan tah tel zel a, kan chanchin puangtute an ni. A dekchhuak thiamte pawh hi in hlu a, in lo bansan ang a, in thiamna hi in lo ngainep mai ang tihte a hlauhawm. Kan kutchhuakte hi kan tana kan siam ni mah se, min rawn duhpuitu an tam chho zel a, a hralhna hi a tha tial tial dawn a ni, a ti a. Tribal Forest products hrang hrangte vawnhim leh chawikan kawnga hmalatu Ministry leh Department te chungah lawmthu a sawi.

State pawn atanga lo kalte chu hun nuam tak hmang tura chahin, mikhual taka awm lo va, chhungkua ang maia inpawh taka Bazar lo hawng tlang turin a chah a. A theih phei chuan Aizawl khaw chhungte fang a, chhungkaw thenkhatte tlawh kual turin a chah a ni.

Khualzahawm Prof. Lalnilawma, Minister, Rural Development & Administration pawhin thu a sawi a, Cooperative Movement hi ram dangah chuan mi tam takin an hlawhtlinpui tawh a. Mizoramah pawh hlawhtlinpui tumin ke kan pen mek. Tun hnaia Lammuala Horti Fair kan buatsaihah pawh khan ni khatah Rs. 20 lakh hu kan hralh ziah a ni. Kan Chief Minister-in a sawi fo thin Mizoram hmathlir, Viksit Mizoram 2047 thleng tur hian kan thingtlang khaw te ber thlenga khaw intodelh kan nih a ngai tih kan hria a. A bulhrum atangin hma kan la mek a ni, a ti.

Pu PS Thuingaleng, IRS, Regional Manager, NE Region pawhin thu a sawi a. Mizorama an VDVK te chu hmarchhak biala an VDVK tha ber berte an nih thu leh an thilsiam chhuahte chuan a funna (packaging) mawi zawk a mamawh thu tarlangin, chutianga an kalpui theih chuan a market lamah hma an sawnin kan ring, a ti. Chief Minister-in Fair a hawnsak avangin lawmthu a sawi bawk.

He Bazarah hian hmarchhak state hrang hrang atanga lo kal stall 13 leh Mizoram atanga tel stall 12, an vaiin stall 25 an awm a. Heng zingah hian Tribal Food Cuisine Stall pahnih an tel a, a dang chu kuta tah textiles te, Mau atanga siam thilte, ei tur lam leh Natural produce zawrhna stall-te an ni a. A siamtu leh a leitute inkara palai (sumdawng) awm lo va indawrna tura duan a ni. Tun kar chhung zawng he Bazar hi kalpui tur a ni ang.

A hawnna inkhawm hi Pu Udit Prakash Rai, IAS, Commissioner & Secretary to the Government of Mizoram, Cooperation chuan kaihruaiin, kalkhawmte lawmna thu a sawi a.  Pu John LT Sanga, Registar, Cooperation chuan lawmthu sawiin a hawnna inkhawm hi a khar a ni.