1376/2026-2027 

Dated Khawzawl, the 13th July, 2026 : Vawiin khan Khawzawl Bawrhsap Pu K. Vanlalthiana chuan Khawzawl district chhunga loneituten Nihawi tel an her chhuah khaw hrang hranga thawn chhuah tur chu District Agriculture Office tual atangin a vailiam a, hemi puala programme hi khuallian niin a hmanpui bawk a. District Agriculture Officer Pi Lallawmzuali chuan hun a kaihruai a ni.

Khuallian Pu K. Vanlalthiana chuan nihawi chin leh a tel her chhuah kawnga Khawzawl District Agriculture Office, Khawzawl KVK leh loneitute thawhrimna chu fakawm a ti a. Sawrkar hotute leh loneitute chu inhnaih leh inpawh taka hna an thawk thei chu lawmawm a tih thu a sawi a. Tunlai khawvel thiamna a sang zela, smart TV leh smart phone kan hmang ang hian kan eizawnna leh kan hnathawh danah pawh smart a ngaih thu sawiin, khawvel thiamna leh finna hian min kalsan chuan kan dingchang thei dawn lo, a ti a. Loneitute chu thla hnih thum chhung lek pawh an lo dah awl mai lova, thil engemaw tal thar chhuah tum turin a fuih a. Loneitu 120 laiin ngaihtuahna thar leh smart tak neia, nihawi chinga, a tel an her chhuak thei chu lawmawm a tih thu sawiin, Khawzawl district an chawimawi tak meuh meuh a ni, a ti a. An tel her chhuah chu an sum lakluh zat atang chauha a hlutna teh lovin, ngaihtuahna thar an neihna leh tel tha leh hrisel zawk an her chhuak chu a hlutna dik tak a nih thu sawiin, kumin hun lo kal zel turah pawh hei aia tam zawk leh tha zawk thar chhuak turin duhsakna a hlan bawk.

DAO Pi Lallawmzuali pawhin thu sawiin, India ramah kan ei leh in atana kan hman ‘Edible Oil’ 60% hi ram pawn atanga lakluh a nih thu leh telah hian kan intodelh a pawimawh thu a sawi a. Tela kan intodelh theihna turin Sawrkar chuan NMEO-Oilseeds Mission a kalpui mek a, nikum lamah Khawzawl District pawhin he Mission hnuaiah hian Nihawi chin nasa takin a kalpui a, amaherawhchu nikum lamah ruah sur mumal loh/pawl delh ruah a sur leh avangin beisei ang tak an thar phak loh thu a sawi a. Nihawi tel hi a hrisel bik em em a, BP sang tan a that bakah zunthlum neite tan pawh a hlauhawm loh bik a, Vitamin E leh thau tha (good cholesterol) a tipung bawk a, Vitamin E, A leh D-a pai tam avangin vun a ti nung a, taksa a natna do theihna a tihchak bawk thu te a tarlang a.

DAO chuan thu sawi chhunzawmin, tun dinhmuna Khawzawl District-a kan tum ber chu loneitute Tela kan intodelh leh tel hrisel tak kan ei theih hi a ni a, kumina kan tel her chhuah 2000 litre vel atang pawh hian loneitu tam zawk chuan a kum khat tla hi an thar hrim hrim a ni, a ti a. Nikum lamah khaw 6-ah Nihawi chin kalpui a ni a, an hmalakna te leh an tel tharte an hmuhin loneitu tam zawk leh khua la ching ve ngailo te pawn an chin duh thu report an dawn thu leh kuminah hian tuna tel an thar aia tam zawk hi an thar leh ngei an beisei thu a sawi a. Nihawi hi nikum lamah khan leiletah buh seng zawh hnuah chin a ni a, kum danga thlai ching lova leilet lo dah awl thinna hmunah hun rei lo te chhunga thar theih, tha leh pawisa sen ngai em em lova Nihawi chin hi loneituten zawngchhang thlak an ti em em a. Kuminah pawh a tam zawkin buh seng zawhah chin an tum leh a, hemi inbuatsaihna atan hian loneitute hnenah buh thar rang chi chin tir an nih thu a sawi bawk.

Subject Matter Specialist (Agronomy), KVK Pu Rambuatsaiha hnen atangin technical report ngaihthlak a ni a. NMEO-OS leh RAD scheme hnuaiah kum 2025-26 chhung khan Khawzawl District ah Nihawi (Variety KBSH 90) chin a ni a. Nihawi hi zau (Cluster) 6 - Rabung, Sialhawk, Biate, Khawzawl, Khawhai leh Kawlkulh ah te chin niin loneitu 120 in Tin 98 hmunah nihawi hi an ching a, DAO hmalaknain tel herna khawl ngaihtuah niin khawl hi hmun thum Khawzawl, Rabung leh Sialhawk-ah te bun a ni a, tel 2000 litre her chhuah a ni a, purity (firna) hi 99.9% a ni. Agriculture Department, Khawzawl District hian loneitute hnenah nihawi chi, Lei lehna, Leitha leh FSSAI Registration te buaipui sakin tel pack-na tur thlengin loneitute an ngaihtuah sak a. DAO leh KVK tangkawpin loneitute hnenah Nihawi chin leh enkawl dan zirtirna pek thin a ni.

Vawiin hunah hian nihawi tel thar chhuak tam ber loneitu pathum hnenah Bawrhsap Pu K. Vanlalthiana’n lawmman a hlan a. ADAO Pu Lalrammuana’n lawmthu sawiin hun a khar a ni.
Lawmman dawngte chu a hnuaia tarlante hi an ni -

1. Pu Khawlnunpuia, Biate – 237 litres

2. Pu R. Lalrualliana, Biate – 204 litres

3. Pu Lalhriatpuia, Biate – 149 litres