1078/2023-2024

Aizawl, July ni 8, 2023: Chief Minister Pu Zoramthanga chuan tukin khan Zuangtuiah Aizawl Smart City Limited hmalakna hnuaia cheng vaibelchhe 15.05 senga sak Indoor Stadium atan lungphum a phum a. Urban Development & Poverty Alleviation Department chuan Zuangtui SR Hall ah hemi pual hian inkhawm a buatsaih. Tourism Minister Pu Robert Romawia Royte chu khualzahawm a ni.

Khuallian Chief Minister Pu Zoramthanga chuan vawiinah badminton khelmi te tana tangkai tak tur, court 6 lai awmna indoor stadium atan lungphum phum a ni chu lawmawm a tih thu a sawi a. Khawtlang leh state angin badminton a hma sawn phah ngei beiseiawm a tih thu a sawi. Chief Minister chuan hmasawnna ruhrel tha din hian a pawimawhna zar zova hmasawnna dang a thlen belh thin dan sawiin, he indoor stadium pawh hi Zuangtui leh a chhehvel veng tan sports lamah mai bakah sumdawnna leh thildangah hmasawnna engemaw tala a thlen phah a beisei thu a sawi. Helai bial hi an vanneih thu Chief Minister hian sawiin, sawrkar ram hmun ruak a la tam avangin sawrkar tan hmasawnna ruhrel liantham tak tak dinna atan a thlanawm hle a ni a ti a. Sawrkar laipuiin cheng vbc 127 a sanction na India ram hnam hrang hrangte inpumkhatna tur atana hmalakna pakhat Unity Mall sakna tur atan pawh Zuangtui bawk hmun remchang a nih dan te, helai hmun hi a la pawimawh chauh dawn avanga kawng zauh leh siam hna thawk tur leh thil dang dangah ruahmanna siam a nih thu a sawi.

Chief Minister chuan harsatna hrang hrang kara hmasawnna kawng chak taka zawh a nih zel thu a sawi a. Tunhnai kum 2018 hnuah a hmalam zawng kum sawmli chuanga sports atana sum hman belhkhawm aia tam sport hmasawnna atan sum hman a nih thu sport department lam hotu ten an sawi chu a tarlang a. Tun hnaia harsatna hrang hrangin ram min tlakbuak te hi malsawmna tam zawk kan haichhuahna theihna tur atana kan paltlang tur chona nia a ngaih thu sawiin, kan ram in malsawmna tam tak a dawn leh a bik takin remna leh muanna hlu tak kan neih te hi hmasawnna kawnga tangkaia kan hman thiam pawimawh a tih thu a sawi.

Khualzahawm Minister Pu Robert Romawia Royte chuan Badminton leh sports discipline dangah Mizo thalaite kan thiam in hmasawnna tur rual kan awt thin hle a, kan mamawhna chhanna sawrkar hotute hnen atanga kan hmu thin hi a lawmawm a ni a ti a. Sports Minister chuan Mizo te infiamna khawvelah kan chim chin a sang zelin, badminton ah pawh national junior category ah champion te an awm chhoh tak thu a sawi a. Badminton ah chuan Idia ranking a that avangin national level a champion chu international level ah pawh an tha thawkhat viau tih a hriat thu sawiin, thalaite an thlen thui chuan sum lakluh kawngah pawh a hlawk thlak thu a sawi. Vawiina Aizawl Smart City Ltd. hmalakna thar chu lawmawm tiin, national tournament pawh la thlen a beiseiawm thu a sawi. Sports Minister chuan tunhnaiah discipline dangah pawh hmasawnna a awm zel chu lawmawm tiin, sports infrastructure tihhmasawn rah kan hmu zelin, zan a inkhelh theihna khelmual buatsaih chuan a tha zawngin danglamna a thlen zel nia a hriat thu te a sawi bawk.

AMC Mayor Pu Lalrinenga Sailo pawh he hunah hian telin, hetiang ang project lian tham hun na atan helai hmun thlan a ni chu khawtlang tan lawmawm a tih thu a sawi a.. Mizoram sorkar chuan harsatna hrang hrang karah development a kalpuo thei zel chu lawmawm a tih thu leh, a bik takin Aizawl Smart City Ltd. hmalakna chuan Aizawl khawpui chhungag hmasawnna liantham a thlen zel dawn avangin lawmthu a sawi a. ASCL hmalakna chu Mayor a nihna ang pawhin thil lawmawm tak nih a hriat thu a sawi a ni.

Inkhawm kaihruaitu Pu Lalmalsawma Pachuau, Secretary, UD&PA Department chuan kalkhawmte lawmna thu sawiin, he Indoor Stadium hi Aizawl Smart City Ltd. hmalakna hnuaiah chuan a liantham ber te zing ami a nih thu a sawi.

Pu C.C. Lalchhuangkima, Chief Executive Officer, ASCL hnen atangin technical report ngaihthlak a ni a. Stadium sak hna hi tan a nih hma in a sakna tur hi lei zawl rem deuh ni mahse soil testing ah a nghet tawklo (low Soil Bearing Capacity) tih hmuhchhuah a nih thu te, Soil Test Report in a rawt angin Mizorama a hmasa ber atan pile foundation hman a nih tak thu a sawi a. Piling ah hian lei hnuai thuk tak ah ban phun hmasak phawt a ni a. Piling foundation chu a nghet tawk em tia enfiahna (pile load test) chu December ni 5, 2022 khan neiin, result tha hmu in sak chhunzawm tak zel a ni a. Pile 112 phum a nih thu leh chumi chungah hian stadium ban tur hi chhun a nih tak thu report ah hian a tarlang a ni.

Mizoram Badminton Association aiawhin an President Pu Lallianzuala Hnamte chuan thu sawi bawkin, Badminton a Mizoramin hma a sawn zel theihna tura sawrkar hmalakna chungah lawmthu a sawi a. Tun hnaiah badminton khawvelah rampum huap inelnaa Mizo thalai te an lan chhoh tak thu leh naupang zinga training pek kawnga nasa taka hmalak a nih dan te a sawi bawk. Inkhawm hi Zuangtui Local Council Chairman Pu Lalchhuanmawia chuan lawmthu sawiin a khar a ni.

Technical Report:

Indoor Stadium, Zuangtui sak han thawktu stan hian Pu F. Lalliansanga, Aizawl Venglai chu thlan (open tender dt 17.12.2021 kaltlangin) a ni a. NTP issue ni hi June ni 10, 2022 niin contract agreement date chu June ni 3, 2022 a ni a. June ni 17, 2022 khan hna thawh tan nghal niin ruahmanna ang chuan thla 18 chhung (10.12.2023) a zawh hman tur a ni. Tunah hian a sak nan cheng vc 2.06 hman tawh niin physical progress chu 29.09% a ni.

Stadium ah hian Badminton court paruk (court area 6.10 x 13.50 m theuh) leh gallery mi 345 thut lenna tur a awm dawn a. Ground floor ah hian lirthei ke pali nei 33 leh ke pahnih nei 39 lenna tur parking area ruahman a nih bakah ticket counter, admin room, cafeteria, pantry, toilet block, pump room, chowkidar room, store room leh adangte dah tum a ni a. First floor chu gymnasium, dormitory, changing & locker room, first aid room, coach room, yoga room leh dangte atan ruahman a ni.

Attachment

  • Loading attachment...