Chief Minister Pu Lal Thanhawla kaihhruaina hnuaiah vawiin tlai khan Chief Minister’s Office conference roomah DONER Minister Paban Singh Ghatowar leh state senior official ten meeting an nei.
Meeting Chairman Pu Lal Thanhawla, Chief Minister chuan DONER Minister leh senior officialte chu lo lawmin, intawhkhawmna hun tha tak an nei chu lawmthu a sawi a. State sorkar ngenna anga NEC Secretary in sum sanction theihna Rs.5 crore atang Rs.15 crore a tihsan anih thuah leh Civil Hospitala CT Scan leina tur sum a pe chu Doner Minister chungah lawmthu a sawi a. Hmarchhak State tana Central Ministries tina GBS 10% dah tura tih, Ministries ten an zawm that tawk lo chu DONER Minister chuan lo enfel se tiin a ngen a. DPR chungchangah technical clearance hmu tura hun rei tak a duh thin thuah lo enpui tur leh Aizawl Greater Water Supply Scheme atana sum la hmuh tur Rs.5 crore pawh release thuai turin a ngen bawk a.
Chief Minister chuan Mizorama Railway Project, Bairabi - Sairang atanga Chhimtuipui thleng rel kawng siam tum turah chak taka hma min lak pui turin a chah bawk a. Hmasawnna Project thawh zawh tawhte leh thawh turte endika viltu tur ‘third party’ atana fund release turin a ngen bawk a. State ngaihpawimawh bik projectte chu ngaihven sak turin a ngen bawk a ni.
DONER Minister Paban Singh Ghatowar chuan state in project a ngaihpawimawh bik te chu a Ministry pawhin a ngaipawimawh ang a ti a. Hna thawh zung zung anih theih nan a officialte chu thawk tam tura a tiluih thin thu a sawi a. DPR te chu technical clearnce nei tura hun duh anih thin avangin Ministry dangte duh duh dana awmlo turin officialte chu a chah a. NEC chu state officialte nen intawhkhawmna tam zawk siam thin tura a hrilh thin thu sawiin, intawhkhawm dan kalphungah tih danglam ngaite chu tidanglam mai se a tih thin thu a sawi a. Mizoram chu literacy rate ah an sanna chu chak leh zuala hma la turin a fuih a. Kum 2010 - 2011 chhunga GSDP 9.57% chu national avaerage aia a tam thu leh Human Development Index ah Mizoram a than nasat thu a sawilang bawk a. DONER leh NEC a project tangkhang awmte chu lo enpui a, Ministries danga tang awmte pawh lo enpui ani ang a ti a. Officialte chu a hun taka (prompt)hna thawk theuh thin turin a chah bawk a ni.
Meeting-ah hian Finance Minister Pu H.Liansailova leh Pu Joseph Lalhimpuia, Vice Chairman, HPC (Lunglei) te bakah senior official thahnem tak an tel bawk a. DONER Ministry atangin Jt Secretary leh Trade & Commerce Director an tel bawk a ni.
