Vawiin chawhma khan Union Minister of State for DoNER, Pu Paban Singh Ghatowar chuan 75 minutes thang turin Saiha a tlawh a. DoNER Minister hian zinglam dar 8:45 AM ah Saiha Helipad-a tumin, Helipad bula Circuit House-ah MADC hruaitute nen reilote in kawmna hun an hman zawhah, Saiha District Medical Complex chhunga GNM School sakna tur lungphum a phum a, medical complex atang chuan Public meeting neih na hmun tur MADC Office tualzawl a pan ding nghal a ni.

Amah lo lawmna inkhawmah hian thusawiin, Pu Ghatowar chuan Mizoram chu state muanawm leh hmarchhak state te zinga hmasawn ber pawl, a ram leilung leh sik leh sa pawh duhthusam a tha,“Khuarel pialral (natural paradise)” a ni, a ti. Pu Ghatowar chuan a Minister chhung hian Mizoram tan NLCPR (Non Lapsable central Pool of Resources) atangin DoNER hian project 21 atan Rs 1039/- Crore sanction tawh a ni, a ti a. Saiha District tan pawh project 5 tan pawisa sanction tawh a ni a, project pahnih phei chu zawh tawh niin, project pathum kalpui mek a ni, a ti. DoNER Minister chuan heng Tuipang Greater Water Supply Scheme (Rs 16.27/-Crore), MADC Secretariat (Rs. 18.94/-crore) leh Saiha Civil Hospital (Rs. 5.5/-crore) project te tan pawh hian sanction a awm tawh a ni, a ti.

DoNER Minister lawman programme Pu Vanlalngena, Adl. DC kaihhruaiah hian Pu RT Zachono CEM, MADC chuan Mara Autonomous District Council hmingin Pu Ghatowar chu darkhuang lian tak a present bawk a ni.

DoNER Minister Pu Paban Singh Ghatowar hi Mizoram Chief Minister Pu Lal Thanhawla te nupa bak ah, Home minister Pu R. Lalzirliana, PHE Minister Pu S.Hiato leh Sports Minister Pu Zodintluanga te leh NEC official ten an tawiawm a ni.