Ni hnih chama Mizoram rawn zin Sawrkar Laipui a DoNER Minister Pu Paban Singh Ghatowar chuan vawiin chawhnu khan Mualpui, World Bank Road-ah Lai Students’ Hostel sakna tur lungphum a phum. He programme ah hian Minister - Pu H. Liansailova, Pu H. Rohluna, Pu Zodintluanga leh Pu Nihar Kanti Chakma leh Lai Autonomous District Council (LADC) hruaitu te an tel a ni.

 Hostel lungphum puala programme tawite Pu Hmunhre, Planning Vice Chairman LADC kaihhruaiah thusawiin Union Minister Pu Paban Singh Ghatowar chuan Lai Students’ Hostel chu Aizawl a mi in luah a lehkha zira awm Lai zirlaite tan an zirna kal zelna tura  a puih ngei a beisei thu leh sak zawh anih hunah chuan an tan malsawnna anih a beisei thu a sawi bawk a. A enkawl DoNER Ministry chuan Hmarchhaka state hrang hrangte a bikin tlang ram state te chu a ngaipawimawh a, hmasawnna ruhrel tha an neih theih nan leh mitin huap hmasawnna (inclusive development) a awm theih nan theihtawp an chhuah zel a ni a ti. Pu Ghatowar chuan Autonomous District Council te hmasawnna chu Mizoram hmasawnnaah a ngaih thu a sawi lang bawk a ni.

 Hemi hnu hian Union Minister Pu Pawan Singh Ghatowar chuan Mualpuia Rajiv Gandhi Stadium sak mek a tlawh a. A hmunah hian Sports & Youth Services Department leh PWD hotulu te chuan Stadium sak zawh anih theih nan sum mamawh belh zat leh tul dangte an sawipui a ni.

 Lai Students’ Hostel sakna atan hian DoNER Ministry chuan Rs. 5.97 crores a ruahman a. Mipa leh hmeichhia 200 ve ve awm theihna tur hostel pahnih sak tura ruahman a ni.

 Vawiin tlai hian DoNER Minister hian Chief Minister Office-ah, Chief Minister leh Mizoram sawrkar a senior officer te nen meeting an nei dawn a ni.