Vawiin chhun dar 12.00 atang khan Tourism Department buatsaih, ni hnih awh tur Thalfavang Kut chu Hmuifang Tourists Resort-ah hman tan a ni a; he Kut hi Mizoram Assembly Deputy Speaker Pu John Rotluangliana chuan a hawng a. Tourism Minister Pu S. Hiato leh Parliamentary Secretary Pu H. Zothangliana ten Thalfavang Kut hi an hmanpui bawk a ni.

Pu John Rotluangliana chuan, “Thalfavang Kut hi mi zawng zawngten intineitu tak chunga hlim taka kan hman tura buatsaih a ni a; a bik takin thalaite tan phei chuan ruihtheih thil tel miah lova hlim tak leh zalen taka hun hmanna remchang a ni a. Khawvel changkang tawh taka cheng thalaite hian mi dang tana harsatna thlen lova hlim taka intihhlim pawh kan zirin, kan thiam sawt hle a ni” a ti a. Tourism Department-in khualzinmite hipna tura kawng hrang hranga hna a thawk chu faktlak a nih thu sawiin, “Tun dinhmunah kan beisei angin foreign leh ram chhung hmun dang atangin khualzinmiten kan Kut-te an lo la chhim lo a nih pawhin, ram dang leh hnam dangte tana tel ve chakawm taka Kut kan hman chhoh zel chuan kan la hlawhtling ngei dawn a ni” a ti.

Pu Vabeiha Hlychho, Tourism Director pawhin Kut hmangtute chibai bukna thu sawiin, “Central sawrkar chuan khualzinmite hipluhna turin festival tam zawk buatsaih turin min duh a; kum 2003-a Shillong-a meeting kan neiha ruahmanna min siampui angin tun hma atanga Shillong-a Mizoten Thalfavang Kut hlimawm tak kan lo hman thin hming chu chhawmin Thalfavang Kut hi kan lo hmang chho ta a ni” a ti.

Thalfavang Kut ni khatna-ah hian Mizo Cultural Organisation (MCO) bultumin hnam lam chi hrang hrang – Cheraw te, Sarlamkai te, Khuallam te bakah Sakeilu lam te, Pasaltha lam te, Dawhzawm lam te, Pawnto te entir a ni a; Chakma, Bru leh Gorkha cultural troupe ten an hnam lam an entir bawk a ni. Mizo zaithiam hrang hrangten Thalfavang Kut hmangtute an awi bawk.

Thalfavang Kut-ah hian Mizo Photographers’ Society chuan Mizoram-a a vawi khatna atan Photo Exhibition an buatsaih a; he exhibition hi Pu Robert Thangmawia MIS, IPRO chuan a hawng a ni. Photo Exhibition-ah hian Mizoram hmel lanna thlalak mawi tak tak 50 zet tarmawi nghal theih tura siamin phochhuah a ni a, a duh tan lei nghal theih a ni a; hlutsaktu an tam hle a ni.