Vawiin khan 11 Mizoram Higher Secondary School Games, 2012 ni 27 -30 November, 2012 chhunga neih chu Ramhlun Sports Complex-ah khar a ni ta.

Kharna Inkhawm hi Pu J.H. Biakmawia, Joint Director of School Education leh Organising Chairman -in a kaihruaia, Rev. Dr. Lalchungnunga, Chairman, Mizoram Board of School Education-in Khuallian niin a hmanpui. Thusawiin Dr. Lalchungnunga chuan Chief Minister leh Sports Minister te hmalakna avangin Sports lamah hmasawnna nasa tak kan nei chho mek zel a, heng hmasawnna te hi a tangkai thei ang ber a hmang turin School naupang te a chah a. Mizoram Board of School Education pawhin Physical Education leh Sports te a ngaipawimawh a, Graded Subject-ah a telh a. Tunah hian Instructional material pawh peih thawkhat a ni tawh bawk a ti a. A ti tha leh lawmman la te a lawmpui a, Sports lam a theih tawp chhuah zel turin a chah bawk a ni.

He School Games-ah hian School hrang hrang 29 (Aizawl pawn - 14 leh Aizawl chhung - 15) atangin players 1463 leh Lecturer 163 te tel in infiamna chi hrang hrang 8 - (i) Athletics (B&G) (ii) Badminton (B&G) (iii) Basketball (Boys) (iv) Football (Boys) (v) Hockey (Girls) (vi) Judo (B&G) (vii) Table Tennis (B&G) (viii) Volleyball (B&G)-ah inelna neih a ni. He infiamnaah hian a pumpui thu ah Govt. Mizo HSS, Aizawl chu sang berin Gold - 17, Silver - 8, Bronze - 13 la in Overall Champion an ni. Pahnihna hi Govt. Chaltlang HSS, Aizawl niin Gold - 6, Silver - 2, Bronze - 5 an la bawk a ni. He infiamna a lo tel zingah School 23 ten Medal an la a, School 6 te’n Medal an la lo a ni. Best Athletes (Boys) chu Vanlalpeka, Govt. Mizo HSS, Aizawl niin Gold - 3 a la a ni.

Best Athletes (Girls) chu Lalremruati, Govt. Mizo HSS, Aizawl niin Gold - 4, Bronze - 1 a la bawk a ni.