3175/2023-2024

Dated Aizawl, the 23rd December, 2023: Vawiin khan Chief Minister Pu Lalduhoma chuan a pisaah Rubber Board of India Chairman Dr. Sawar Dhanania leh a thawhpuite nena inkawmna an nei a. Mizorama rubber tharchhuah tihpun dan tur kawng hrang hrang te an sawi dun.

He hunah hian Chief Minister chuan Mizoramah Deputy Rubber Production Commissioner dah turin a lo ngen a, Mizoram-a rubber chingtuten rubber sawngbawlna hmanraw thenkhat Tripura atanga an la chawkluh thinte chu Mizoramah ngei awm ve thei se a duh thu a lo hrilh a bawk. Rubber thar chhuah kawngah hma kan sawn zel theih nan state sawrkar chuan a tihtheih apiangte a lo ti ve dawn tih hrilhin, vawiina an sawi hona eng atanga ruahmanna tha zawk Mizoram sawrkarin a duan theih a beisei thu pawh a hrilh a ni. Tin, tuna a tharchhuak tawhten quality tha zawka an rubber an sawngbawl dan tur te, an tharchhuahte thawkpalai (middleman) awm lova a leitu Company-a an hralh theih dan turte, rubber chingtuten insurance an tih ve dan turte leh thil pawimawh dangte pawh an sawi ho a ni.

Dr. Sawar Dhanania chuan, India ramah rubber chinna hmun hi INROAD Project hmangin hactare nuaih 2 a zau siam belh an tum mek thu leh Mizoramah pawh kum 2021- 25 chhunga hactares. 9000 hactares an target thu te a tarlang a. Mizoramah tunah hian rubber hactares 6770 a zauvah chin tawh a ni a, la chin belh theihna ram a neih zawng zawng chu Hactares singnga a zau a la ni, a ti.

Tunah hian Rubber hnai thei tawh chhungkua 3000 chuang Mizoramah an awm mek a, an zinga a tam zawk hian hmanrua an mamawh ang te an la neih kim loh avangin chhungkaw 400 vel chauhvin an la hnai thei niin Mizoram Rubber Society hruaitute chuan an tarlang. Heti chung hian kum tin Metric Ton 1460 chuang an thar tawh niin sawi a ni a, a hnai thei tawh zawng zawngten an hnai vek hunah chuan nasa takin Mizoram rubber tharchhuah hi a pung dawn a ni.

Chief Minister hi Pu K. Lalthawmmawia, IAS, Commissioner & Secretary to Chief Minister, Pu Hualthanga Chhakchhuak, Director, Land Resources, Soil & Water Conservation leh Rosy Lalmuansangi, Jt. Director ten an tawiawm a, Mizoram Rubber Society hruaitute an tel bawk.