3397/2022-2023

Aizawl, 28.01.2023: Kumin March ni 2 a Mizoramin G20 meeting a thlen tur atana inpuahchahna kal mekah Chief Coordinator Pu Harsh Vardhan Shringla leh a thawhpuite chuan vawiin khan Chief Minister Pu Zoramthanga chu CM Cabinet Meeting room-ah hmuin an inkawm.

He meeting-ah hian G-20 meeting state danga lo thlen tawh dan tlangpui leh state hrang hrang inpuahchah dan te presentation pek niin, Mizoram atanga an beisei te sawi a ni a. India ramin G-20 Presidency a chelh chhung hian khawvel mit hmuha ram hmasawnna leh India rama hmun leh culture danglam tak tak mawina phochhuah a nih dawn avanga ngaihpawimawh tul an tih te tarlan a ni a. G20 meeting an nghahna tur khawpui hrang hrang cheibawl kawngah leh, khawpui infrastructure tihchangtlunna atan remchanna la turin ruahmanna siam tha an tih thu an sawi a. Delegates te hi khawvel ram hrang hrang atanga lo kal tur an nih avangin hnam ziarang phochhuak a, mahni state theuh hmasawnna tur potential tarlan thiam pawimawh an tih thu sawi a ni.

Khawvel economy hmasawn zelna tur atan leh inrelbawlna atana ram sawrkar hrang hrang intelkhawmna pawl G20 hi Group of Twenty (G20) tihna niin, ram 19 (Argentina, Australia, Brazil, Canada, China, France, Germany, India, Indonesia, Italy, Japan, Republic of Korea, Mexico, Russia, Saudi Arabia, South Africa, Türkiye, United Kingdom leh United States) leh European Union te an tel a. Heng G20 ramte GDP belhkhawm hi khawvel GDP 85% a tling a, khawvel pum huap insumdawntawnna 75% chu G20 rama thleng niin, khawvel mipui tam zawng hmun thuma thena hmun hnih chu G20 rama chengte an ni.

Kum tin G20 member ramte hian Presidency nihna an inchelh chhawk thin a. Nikum khan Indonesia in changin, kumin India ramin Presidency a chelh chhung hian G20 meeting hrang hrang khawpui engemawzatah neih a ni dawn a. A meeting pui ber G20 summit chu September thla New Delhi a neih tura ruahman a ni. Aizawl a G20 meeting thlen tur hi B20 tia hming vuah niin, "multilateral business partnership session" a hman tur a ni.