3398/2022-2023
Aizawl the 27th January 2023 : Nimin khan Save Chite Lui Coordination Committee-te chuan Local Council leh NGO-te nen Chanmari YMA Hall-ah inkawmhona an nei a, Chite lui vawngfai leh humhalh zel dan tur an sawipui a ni.
Mizoram Chief Secretary leh Save Chite Lui Coordination Committee Chairman ni bawk Dr. Renu Sharma chuan thu sawiin Chite lui vawn thianghlim chu Mizoram sawrkarin ngai pawimawhin humhalhna Dan pawh engemawzat a siam tawh thin a, a hlawhtlinna tak tak erawh chu mipuite kutah a awm a ni a ti. Bawlhlhawh leh tui chhia paih danah mipuite an fimkhur tawk lo hle a ni a ti a, mi zawng zawng tan la thar leh turin a sawm a ni. Chite luikama awm Veng leh Khuate chu an pawimawh bik hle a, neitu thinlung pu a, lui chereu tur ven kawngah theihtawp chhuah turin a ngen a ni. Pi Renu Sharma chuan Save Chite Lui Coordination Committee-te hmalakna hrang hrang sawichhuakin Chite lui chu lui thianghlim taka siam thuai a nih leh theihna tur chuan sawrkar Department te, Local Council, Kohhran leh tlawmngai pawl hrang hrangte thawhhona tha a pawimawh hle a ni tiin thawhpui zel atan a sawm nghal a ni.
Principal Chief Conservator of Forests(PCCF) Pu R.K.Singh pawhin thu sawiin Chite lui chereu zel tur venhim nan leh tuihna tha tak a neih theihna turin thing leh mau humhalh a pawimawh hle a ni a ti a, ramngaw venhimna kawngah theihtawp chhuah turin kalkhawmte chu thawhpuiah a sawm nghal a ni.
Aizawl Deputy Commissioner Dr. Lalhriatzuali Ralte chuan mipui rilru sukthlek tihdanglam a ngaih thu sawiin kalkhawmte chu midang tan entawn tlak ni theuh turin a chah a, vantlang mipuite chu theihtawp chhuahpuiah a sawm bawk a ni.
Nimin inkawmhona hi Save Chite Lui Coordination Committee-a Treasurer Dr. H. Lalruatsanga leh Gen. Secretary Pu Rochamliana ten kaihruaiin Veng 16 atangin Local Council leh NGO-te an tel a ni.
