Vawiin khan Chief Minister Pu Lal Thanhawla leh Chief Justice, Gauhati High Justice Ajit Singh te chuan Gauhati High Court, Aizawl Bench Pisa sakna tur lungphum chu New Secretariat Complex ah an phum a, hemi lantir nan hian a rualin ‘Foundation Stone’ ziahsa an pawt pharh a ni.

Chief  Minister Pu Lal Thanhawla chuan Aizawl mai ni lo, New Secretariat hmun laili takah High Court Building thar sakna tur atana ram hmuh a ni chu lawmawm tiin Building tha leh changtlung tak, Mizoram leh mipui tan pawh chhuanawm tak sak ngei a beisei tih a sawi a. Hun hmasa lamah helai hmun hi Raj Bhawan atan tih ni mahse a building sak te chu Governor lo awm tawh thin ten luah tlaka ngai lovin an luah lum lova, an hnarna chu Gauhati High Court tan malsawnna a ni ta nia a lan thu a sawi a. Kum 1990 a Lungmuala Gauhati High Court, Aizawl Pisa Bench hawnna a tel avangin vawiin ni, High Court Building thar changtlung tak sakna tur lungphum a ni ta chu amah tan ngei pawh thil hriatrengna tur anih thu leh Mizoram leh mipui tan thil lawmawm tak a nih thu te a sawi a. A sakna tur atana mawhphurhna pek ten ruahmanna awmsa ngei angin a hun taka he Building hi an sak ngei a beisei tih a sawi bawk.

Dan leh hrai chungchang a sawi naah Chief Minister chuan dan rorelna hi hleih nei lova dan lalna awm tir tu a ni a, kan dan rolrelna in (court) te hi Ram Danpui enkawltu, mawphurhna lian ber nei an nih angin court te hi thubuai, hlabuai remna forum pawimawh ber leh dan siam reng rengte hleih nei miah lova a dik taka dan kengkawhtute an ni a. Inrem lote inrem tir tu te leh mipui dikna leh chanvo humhalh sak tute an ni a chuvangin engtik lai pawhin mipuiin beiseina sang tak neiin an thlir reng thin a. Chuvangin rinhlelhna, duhsakna leh awnna te hi a leng lo a ni, a ti.  Mizo te chu remna leh muanna duh mi kan nih angin thubuai tam tak te hi Village Council Court  leh District Court level ah inremin thubuai te hi a tawp thin a, hemi avang hian High Court a thubuai ngaihtuah tur tang (pendency) hi an nei tlem a ni, a ti.

Thusawitu dang Chief Justice, Gauhati High Court, Justice Ajit Singh chuan thubuai neite leh thubuai ngaihtuahtu te mamawhna sang cho zel ngaihtuahin High Court Building thar Mizoram in a nei tur chu a lawmpui thusawiin hun rei tak atanga Gauhati High Court,  Aizawl Bench in hmun nghet neih an suangtuahna chu a taka a chan avangin Court tan chuan thu lawmawm tak a ni, a ti. Building tha tak sak a nih theih nan a sak laiin vilzui leh enpui a pawimawh dawn tih a sawi bawk.

He huna inlawmna thusawitu Gauhati High Court, Aizawl Bench-a Portfolio Judge, Justice Michael Zothankhuma chuan Mizoram Sawrkarin in hmun tha tak a ngaihtuah sak avangin Sawrkar chunga lawmthu a sawi a. Helai hmun neih a nih theih nana theihtawp chhuaha hma latu Judge lo awm tawh te hnenah lawmthu sawi bawkin a hmun ruahman anih dante a tobul atangin a sawi.  Gauhati High Court, Judge, Justice Nelson Sailo’n lamwthu sawiin programme kharna a nei a. Chief Engineer (Buildings), PWD Pu Lalmuankima Henry’n High Court Building thar sak dan tur leh ruahmanna awmte sawiin Tehnical Report a tarlang a ni.

High Court Building thar tur lungphum phumna programme ah hian Advocate General Pu B. Deb, Law & Judicial Department hotulu te, District leh Sessions Judge-te, Mizoram Bar Association member te bakah Aizawl Bench, Gauhati High Court puipa te leh hnathawkte an tel bawk a ni.

High Court Building thar sak tur ah hian Block pali – A, B, C leh D te a awm dawn a, Block A, B leh C zau zawng belh khawm hi square metre 11612.98 a zau a ni dawn a, Block D zau zawng chu square metre 1885.95 a zau a ni dawn a. A building hi Mizo pa chhiara chawng li tura ruahman niin Visiting Judges Bungalow, square metre 274.18 a zau a project ah hian ruahman tel a ni bawk. A sak nan hian cheng nuai 4624.12 ruahman niin contractor atan North East Consultancy Services (NECS) thlan an ni. A sakna tur sum za zelah 90 hi DoNER Ministry in an tum dawn a ni, hemi atan hian first instalment cheng nuai 1471.90 an released tawh a, Mizoram Sawrkar pawhin state matching share cheng nuai 163.54 an released tawh bawk a ni. Kum thum chhunga sak zawh tura ruahman a ni.