1121//2023-2024

Aizawl, July ni 13, 2023: Vawiin khan Chief Minister Pu Zoramthanga chu a pisa ah IFAD (International Fund for Agricultural Development) hotu pahnih Pu Ulac Demirag, Country Director leh Pu Piyusg Kanal Country Programme Analyst te chuan hmu in Mizorama agriculture tihhmasawnna chungchang an sawiho.

IFAD bultumin tumah hian FOCUS Project chu Agriculture Department nen thawk hovin kalpui mek a ni a. IFAD hotute chuan Chief Minister hnenah hian sawrkar nen thawhhona tha ta an neih zel an beisei thu sawiin, tuna project kal mek ah harsatna an tawh thenkhat te an sawipui bawk a. Chief Minister chuan sawrkarin theihtawp a chhuahpui tur thu a sawi.

IFAD Country Director Pu Ulac Demirag chuan khawsak harsa berte puih a an khawsak phung in hma a sawn theihna tura eizawnna ngelnghet zawk an neih theihna tura puihna leh zirtirna pek chu an tum ber a nih thu a sawi a. Mizoramah chuan agriculture behchhana mahni kutkawih eizawnna lama tui mi leh remhriatna nei tam tak an awm thu sawiin, an hlawhtlinna theihna tura mimal chauh a an tih theih loh te chu tih sak turin FOCuS project leh sawrkar chu an thawhho a pawimawh thu a sawi.

Chief Minister Pu Zoramthanga chuan agriculture leh a kaihhnawih sector ah Mizoram chuan potential tha tak a neih thu sawiin, heng ramin theihna a neih te hi tangkai thei ang bera haichhuah a mipuiin hlawkna an tel theihna turin hmalak thiam a pawimawh zia te a sawipui a. IFAD hmalakna chuan kuthnathawktute tan hamthatna a thlen ngei a beisei thu hrilhin state sawrkar nen thawhhona tha tak neih zel a duh thu a sawi bawk.

FOCUS Project hian IFAD fund hmangin hna a thawk a. SCRAM (Society for Climate Resilient Agriculture in Mizoram) chu a Implementing Agency niin, Mizoram leh Nagaland ah kalpui a ni. Mizoramah chuan Department pali (4) Agriculture, Horticulture, Land Resources, Soil & Water Conservation leh Animal Husbandry & Veterinary department te thawhhona hnuaiah FOCUS Project hi kalpui a ni a, Agriculture department hi Nodal Department a ni bawk.

Mizoram District paruk (6) – Champhai, Kolasib, Serchhip, Mamit, Saitual leh Khawzawl District chhunga khaw 300 ah hmalak a ni a. Chhungkua 42,797 ten FOCUS kal tlang hian hamthatna an dawng tawh a ni.

He Project in a tum pawimawh tak pakhat chu zawi zawi a tlangram Lo vah leh Lo hal kalsan a, sik leh sa mil a thlai kum hlun hmanga Lo neitute sum dehchhuah tihpunsak a ni. Hemi ti hlawhtling tur hian FIG (Farmers Interest Group) din niin, an ni kaltlang hian hmalak thin a ni. Chung hmalakna tam tak zingah hengte hi a tel a ni:
1. IFS (CADA): Integrated Farming System (Compact Area Development Approach) hi khaw 20 ah kalpui mek a ni a. Ngialnghet tak leh ram ti chereu lo zawnga huan kumhlun nei thei tur in heng khaw 20 te hi hmalakpui mek an ni. Heng hmunah te hian FOCUS Project chuan terrace siam, tui hna khuah, tui lak leh tui dah khawl na (Check dam, water storage & delivery system), chang kham (log wood bunding), leh kawng laih leh siam (link road) ten hma nasa takin ala a ni.

2. Ranvulh : FOCUS hian a chunga IFS a tel tho siin ranvulhtute tan hma nasa takin a la a. Vawk vulh lamah hma lain vawkte leh a in sakna a tum saka, backyard poultry (awmhmuna ar vulh) kawngah hmeichhe tan ar chi tha a pe a, Sial vulhtute hnenah an sial in huan thlai a tih chhiat thin ven nan a hungna a siamsak bakah an awmna tur leh an hrisel zawkna turin hma a la a ni. Kel vulhtute tan an kel vulh hnutetui tihtam nan hmalak a ni bawk.

3. Innovation Fund: Hemi ah hian thalai mi thiam, hmalak tum bultanna nei lo te tan tanpuina a pe a. Hei thalaite tan chona nasa a siam bakah an tum tih hlawhtlinna turin kawng a siam a ni.

4. FOCUS Engineering Cell hnuai atang hian kuthnathawktu chhungkaw 15 ten mat lui an kalkai nan Suspension bridge, Serchhip district ah sak zawh tawh a ni a. Hemi bakah hian FOCUS district paruk huam chhunah Suspension Bridge 30 dang chhungkaw 400 bawr vel tan siam leh tura hmalak mek a ni bawk. Kuthnathawktu ten awlsam zawk a an thlai thar an phurh chhuah theih na turin Agriculture Horticulture link road 23 kms (concrete road) hi Serchhip leh Khawzawl district tan hmalak mek a ni bawk.