1122//2023-2024

Lunglei the 13th, July' 2023: Lunglei District Football Association hruaitu te sum thawhkhawm a buatsaih LDFA Presidential Cup 2023 kick Off na hun chu nizan dar 8.00pm khan Convention Centre, Lungleiah neih a ni. He hun hi Sports Minister Pu Robert Romawia Royte in khuallian niin a hmanpui a, LDFA Presidential Cup 2023 kick Off na a nei nghal.

LDFA Presidential Cup 2023 Kick Off na hun Tv. H. Lalawmpuia, Vice Chairman, Organising Committee kaihhruaiah khuallian Pu Robert Romawia Royte chuan Lunglei thalai ten Football a hma an sawn theih nana LDFA hruaitu President, Sr.Vice President leh Vice President ten cheng nuaithum thawhkhawm a LDFA Presidential Cup 2023 an buatsaih thei chu lawmawm a ti a. Lunglei District in infiamna kawnga hma a sawn theih nan sorkarin hmalakna tam tak a kalpui a, a hlawhtlinna pawh a takin hmuh chhoh zel a nih thu a sawi. Tun sorkarah Mizorama infiamna ruhrel tihchangtlun nan State Budget piah lamah Central leh Agency hrang hrang atangin hmasawnna hna thawhna tur sum tam tak hmuh a nih thu a sawi a, Lunglei District ah pawh hmalakna tam tak thalai ten an chhawr tur Zobawk Sports Academy bakah veng hrang hrangah, Basket Ball Court, Futsal Ground, Football Ground atan hmalak mek a nih thu a sawi bawk. LDFA hi District Football Association ah hmasawnna lama pakhatna an nih avangin District dangten an entawn thin thu sawiin hei hi lo chhawm nung zel turin a chah bawk. Sorkarin thalai leh infiam mite a ngaipawimawh a rah tha zawk a chhuah theih nan thalai te chu theitawp chhuah zel tur leh ruihhlo laka fihlim theuh turin a chah a ni. Presidential Cup hi infiam miten sporting spirit pu a khel theuh tura chah in, he Football match hian infiam mite ah inunauna tha zawk thlen se, ruihhlo avanga harsatna te hi football hmanga do theuh turin a sawm a ni. Sub Hqrs YMA, Lunglei Golden Jubilee October 2023, a hmanna tur pualin YMA leh LDFA te tangkawp chuan YMA Inter Branch Football Tournament buatsaih a nih tur thu a sawi bawk.

LDFA Presidential Cup 2023 kick Off na hun ah hian Pu R. Lalnunthara, Hon. Vice President, MFA leh Pu PC. Lalramnghaka, President LDFA te pawn thu an sawi a ni. Prsidential Cup 2023 ah hian team 23 telin  LDFA hnuaia Affiliated Club 20 leh Lunglei khawpui pawn atangin  Vanva, Ngengpui leh W.Tuipui zone te an tel ni. LDFA Presidential Cup 2023 hi vawiin ni 13.7. 2023 atangin khelh tan a ni anga ni 26.7.2023 ah Final hi khelh a ni ang. LDFA Presidential Cup 2023  ah hian Champion team in Rs 50,000/- leh Trophy, Runners up team  in Rs 25,000/- leh Trophy te an dawng ang.