1123//2023-2024

Aizawl the 13th, July' 2023: Vawiin khan 22nd Law Commission of India hnenah Mizoram Rajya Sabha MP Pu K.Vanlalvena'n tunlai India ram politics a sawi hlawh tak Uniform Civil Code hman tumna awm mek dodalna thu a thehlut.

Pu Vena chuan Law Commission Member Secretary Pu Khetrabasi Biswal hnenah lehkha thehlutin Mizoram chu British kuta a luh hmain kum tam tak mahnia ro inrel thin a nih thu te; British awpna hnuaia kum 57 chhung a awm lai pawhin India rama a tel ngai loh thu te; leh British lak atanga India Independence sual lai zawng zawng pawhin Mizoram chu India ah a tel ve loh thu a tarlang a. Kum 1947a India ram thar a pian hnuah Mizote awm dan tur chingfel hmasa lova British hovin an chhuahsan tawp avangin India constitution ah pawh engmah tarlanna awm lovin Mizoram chu India ah a bet ta a. Hemi avang hian kum 20 lai MNF in India ram atanga zalenna a sual tih tarlangin Pu Vena chuan kum 1986 June ni 30 ah India leh MNF ten inremna siamin Indian Constitution article 371(G) chu Mizoram venhimna bik atan siam a lo nih tak thu te Law Commission hotute hnenah hian a thlen bawk a.

Pu Vena chuan India ramah Uniform Civil Code hman a nih chuan article 371(G) a khawih pawi theih tur thu leh chutah chuan Mizote humhimna hrang hrang - ram neitu nihna te; Mizo sakhua leh vantlang nun te; Mizo hnam dan leh culture humhimna chungchang te a inziah thu a tarlang a. UCC hian heng Mizo hnam himna dan te hi a tihchhiat theih dawn avangin na taka a dodal thu leh North East tribal hnam hrang hrangte tan pawm theih a nih loh thu a tarlang nghal bawk a ni.

Tunlai hian Uniform Civil Code hi India ramah hman chi a nih leh nih loh zirchianna India ram Law Commission 22 na chuan a nei mek a. June ni 14, 2023 atanga chhiar tanin ni 30 ral hma ngeia Union Law Commission hnenah hian mahni ngaihdan thehluh theihna hun hawn mek a ni a. Ngaihdan hrang hrangte la khawm hmasain Parliament Sessionah put luh chi a ni dawn nge dawn lo Law Commission hian an zirchiang mek a ni.