Cheng nuai 900 senga Indo-Israel Project under Mission for Integrated Development of Horticulture (MIDH) kaltlanga buatsaih, India hmarchhaka a hmasa ber Indo-Israel Centre of Excellence For Fruits Lunglei, Haulawng leh Mualthuam ‘N’ inkara mi chu vawiin khan Chief Minister Pu Lal Thanhawla leh Israel Ambassador to India Pu Daniel Carmon te chuan an hawng. 

Chief Minister Pu Lal Thanhawla chuan Mizo ten kan ram ngaihhlut leh ngaihsan em em Israel nena kuthnathawkte hmasawnna tura kan thawkho thei hi a lawmawm takzet a ni tiin hemi kawnga chak taka hma la tu DoNER Minister Dr Jitendra Singh, leh Horticulture Minister Pu PC Lalthanliana leh Department a thawkte chungah lawmthu a sawi a. Haulawng leh Mualthuam ‘N’ khawtlang mipuite leh khawtlang hruaitu VC-te hnenah pawh lawmthu sawiin phal taka ram an pek avangin hetiang hmasawnna ruhrel lian tham tak, Mizoram pum ina kan chhawr tangkai theih tur kan neih theih phah a ni, a ti. Israel palaite leh MASHAV mithiamte chu he Centre of Excellence hlawhtlinna tur hian an phur takzet a, an hun leh tha nasa tak an seng tawh a ti a, mipuite leh Department hnathawkte chu he Centre of Excellence thiltumte ti hlawhtling ngei turin taima tak leh rilru nei taka thawk chhunzawm zel turin a chah a. Rinawmna, dikna leh taimakna rilru pu chungin he ram hi kan siam dawn a ni, a ti. 

Chief Minister chuan ram hmasawnna zelna tur leh kuthnathawktute leh mirethei ten  leirem an rah theihna turin sawrkarin a phak tawk leh thiam ang angin hma a la chhunzawm zel dawn a ni tiin kuthnathawktute hlawhtlinna lawmpuina NLUP Kutpui ropui leh hlawhtling tak Assembly Annexe Building, Aizawlah neih a nih mek thu a sawi a. Mirethei, khawsaka harsa ten eizawnna ngelnghet an neih theihna turin NLUP kaltlangin chhungkaw sing tam tak tan eizawnna rahbi kan tuk sak a, a hlawhtlinna chu hmuh theihin a awm mek a ni, a ti.  USA rama Zirna In hmingthang tak University Of Minnesota pawhin NLUP chu tha an tih em avangin tel ve an dil a, Mizoram University nen thawhhona thuthlung  ziakin tun thlengin an thawk chhunzawm zel a. NLUP hmalakna leh kalpui dan chu UNO pawh in tha tiin a peng pawimawh tak tak te nen Aizawlah an Office te hawngin Mizoram sawrkar an thawhpui mek a. Chung UNO peng zinga pakhat IFAD atang phei chuan hnathawna tur sum tam tham tak beisei mek a  ni,  a ti bawk. 

Mizoram Sawrkar hmalakna thar pawimawh tak New Economic Development Policy (NEDP) chungchang pawh sawiin Chief Minister chuan he policy kaltlang hian hmasawnna daih rei (sustainable development) Mizoramin kan nei thei dawn a ni, a ti. NEDP chu tang te tanpuina tur a ni tiin mahni ke a dinchhuah tum tak tak te chu sawrkarin a dawm kangin an mamawh te a hai chhuah pui zel dawn a ni a ti. Lekhathiam hna neilo te mahni ke a an dinchhuah theih nan India ram puma Manangement zirna in tha ber zinga mi Indian Institute of Management Kolkata (IIM-C) nen Entrepreneurship Development Scheme (EDS) chu hlawhtling taka kalpui chhoh mek a nih thu a sawi bawk. 

India ram state thang tha ber pali zingah Mizoram a tel ve thu sawiin Chief Minister chuan khawvelin hmasawnna tehna a hman lar ber Gross State Domestic Product (GSDP) thanna NITI Aayog chhut danin za zelah pariat (8%) ni mekin kan ram a thanduang chhunzawm zel a, Sawrkar Laipui Ministry of Finance hnuaia Economic Affairs Department-in a chhutlawk danin GSDP punna hi double digit a ni chho dawn a ni, a ti. Hetiang ang hmasawnna chak tak kan neih thei hi a ropui takzet a, inzir zel tur leh hmabak pawh kan la ngah avangin i tang mar zel ang u tiin mipuite chu thawhho puiah a sawm a. 

Indo-Israel Centre of Excellence For Fruits chu Mizoram pum tan hmasawnna rahbi pawimawh tak a ni a, a ti hlawhtling turin mawhphurhna kan nei theuh a, kan ram hmasawnna leh hlawhtlinna innghahna chu ram leilung fate an ni tiin Chief Minister  ram siam tura tan lak puiah mipuite a sawm a ni. 

Hawnna programme ah hian Israel Ambassador to India Pu Daniel Carmon pawhin thu sawiin India leh Israel ram ten hmasawnna hna lian tham kalpui turin thawhhona tha tak an nei  chhunzawm zel chu lawmawm a tih thu sawiin Indo-Israel Centre of Excellence For Fruits a hlawhtlin ngei theihna turin Mizoram sawrkar leh mipuite hnenah duhsakna a hlan a. Agriculture lamah leh tui renchem taka hman thiam (water management) kawngah nasa taka hmalakna leh thawhhona kalpui zel a nih tur thu sawiin Pu Daniel Carmon chuan India leh Israel thawhhona chu “Technological Partnership” hlu tak a nih thu a sawi a. He hmasawnna ruhrel tangkaina paw chhuak tur chuan kuthnathawktute an pawimawh hmasa ber a, training programme te hmang tangkaiin an in tuaihriam a tul a ni, a ti. He Centre of Excellence nei thei tura chak taka hma la tu Chief Minister Pu Lal Thanhawla chu fakawm a tih thu sawiin Israel Ambassador chuan India ram state hrang hrang a Centre of Excellence kalpui mek ang bawkin hlawhtling taka Mizoramin kan kalpui ngei a rin thu a sawi bawk. 

Hawnna inkhawm hi Horticulture Minister Pu PC Lalthanliana chuan kaihruaiin kalkhawmte lawmna thu a sawi a. Chief Minister leh Israel Ambassador ten a hmunah ngei an rawn telpui thei chu lawmawm a tih thu sawiin Centre of Excellence  hlawhtlinna turin Chief Minister-in phur takin bul a tan pui avangin a chungah lawmthu a sawi a.   Hawnna inkhawm-ah hian Pu Vanlalnuntluanga Renthlei, DHO Lunglei –in Technical Report pein Dr. Elizabeth Saipari, Director, Horticulture in lawmthu sawiin hun a khar a ni. 

Vawiin Indo-Israel Centre of Excellence For Fruits Lunglei hawnna ah hian Lunglei DC Pi Lalzarmawii, IAS leh sawrkar department hrang hrang hotute, tlawmngai pawl aiawhte, MJA hotute, khawtlang hruaitu VC-te leh mipui thahnem tak an kalkhawm a ni. 

Indo-Israel Centre of Excellence For Fruits hi Haulawng leh Mualthuam N in rina hmuna awm niin Haulawng VC leh Mualthuam VC-ten a hmun tur hi Horticulture Department an pe a. Indo-Israel Agriculture Project (IIAP) hmangin Mizzion for Intgrated Development of Horticulture Scheme kaltlanga hnathawh a ni. He Centre hi India ram hmarchhaka Centre of Excellence hmasa ber tur niin Israel Technology hmangin Rs 900 lakhs senga din a ni. Kum 2015 ah hna thawh tan niin kumin hian zawh fel a ni a, a hmun zau zawng chu 10. 20 Hectares a ni.