Vawiin khan Chhimveng YMA Hall Mamit-ah Mizoram State Commission for Women (MSCW) huaihawtin Legal Awareness Programme on Laws Related to Women buatsaih a ni a. Pi Lalbiaksangi, Mamit District Bawrhsap chuan khuallian niin he hun hi a hawng.

Khuallian chuan thu sawiin mipate aiin hmeichhiate chu chak lo zawk leh awmnem zawk kan ni a, hei vang hian India danpui pawhin nasa takin min humhalh a ni a ti. Mizo hmeichhe fel tak tak karah demawm tak tak kan la tam thu sawiin mote chunga that chhuah duh miah lo, mote be tha duh lo leh tihduhdah ching kan la awm thin chu pawi a tih thu sawiin kan mo theuhte kan en danah tun aia nasa zawka inenfiah kan ngai a ni a ti. Chutih rualin Mizo hmeichhe entawntlak tak tak, eizawnna kawngah te, hnathawh that kawngah te chawimawi tlak an awm zel a, chung hmeichhiate chu kan Icon/Idol-ah thlanga entawn thin turin kalkhawmte a chah a ni.

Pi Zodinthangi, Member Secretary, MSCW chuan Mizoram State Commission for Women din tan a nih dan te, a thil tum bakah hmalakna hrang hrangte sawifiahna a nei bawk.

He hunah hian mithiam sawmbikte'n thupui hrang hrang hmangin zirtirna an pe a. Pi Gracy L. Bawihtlung, Chief Judicial Magistrate, Mamit chuan Hmeichhiate danin a humhalh dan tih thupui hmangin zirtirna a pe a. Tommy Hmingdailova, Legal cum Probation Officer, DCPS, Mamit pawhin POCSO Act, 2012 zirhona tih thupui hmanga zirtirna a pek bakah Dr.T. Vanlaltlani, Member, MSCW chuan Pawngsual leh hmeichhe laka hleilenna - Pathian thu atanga thlirna chungchang sawiin zirtirna a pe a. Kalkhawmte atanga sawihona leh hriatfiah loh lai zawhna leh chhanna hun hman a ni bawk.

Vawiin Programme hi Inaugural, Session - I leh Session - II ah te then niin Inaugural Programme hi Pi Margaret Zohmingthangi, IAS (Rtd.), Chairperson, MSCW in a kaihruai a, Session - I hi Pi Zodinthangi, Member Secretary, MSCW chuan kaihhruaiin Prof. Zokaitluangi, Member, MSCW chuan Session - II hi kaihruaiin kalkhawmte hnena lawmthu sawina a nei nghal a ni.

He hunah hian Mamit khawpui chhunga Head of Department, Village Council hrang hrang aiawh, NGO hrang hrang, Kohhran leh tlawmngai pawl hrang hrang aiawhte bakah College zirlai naupangte an tel a ni.