Mizoram Sawrkar hmalakna hnuaia NEDP  Tour, Mamit Area huam chhunga MUP Member  te chuan nimin khan Tuirial Hydel Project an tlawh.

NEDP Tour te hi Pu Paul Rokima, DIPRO, Mamit chuan hovin MUP Member te hi mi 19 an ni.

NEDP Tour-a kal Mizoram Upa Pawlte chuan kum upa zawkte hmakhua ngaia Sawrkar hmalakna leh hmasawnna hmu thei tura hun remchang siamsaktu, Mizoram Sawrkar leh I&PR Department te chungah lawmthu an sawi a. Mizoram tana mellung pawimawh tak,  kawlphetha pek chhuahna tur Tuirial Hydel Project tlawh theia an awm chu hlawkthlak an tiin lawmawm an ti hle ni.

Tuirial Hydel Project hi Pu Lalthan Hawla, Mizoram Chief Minister chuan kum 1998 ah lungphum phumin engngemaw chen hna a khaihlak hnuah kum 2011 khan thar thawh leh a ni a, tunah hian  NEEPCO te chuan enkawlin, nikum khan hman theiha hawn a lo ni tawh a ni. HEP enkawltu NEEPCO hotute hian Tuirial Hydel Project leh  a chhehvel a khaw awm tan hian Corporate Social Responsibilities (CRS) hnuaiah Bazar Shed tha tak an siamsak bawk a ni.

Tuirial Hydel Project hi megawatt 60 pe chhuak thei tur niin Unit 2 a then a ni a. Unit pakhat hian Megawatt 30 ve ve pe chhuak thei tura ruahman a ni, tuichim chin tura ruahman aia a san pawha paihchhuahna tur spill way gate tha tawk tak pathum siam a ni bawk. 

NEDP Tour-a MUP Mamit Area Tuirial Hydel Project tlawhtute zingah hian bul tan a nih laia mita lo hmu ve tute an nih avangin hetianga a hlawhtlinna a taka an han hmu leh thei chu ropui an ti hle a, hetiang hun buatsaihsaktu Mizoram Sawrkar chungah lawmawm an ti hle a ni.

Mamit Area MUP NEDP Tour te hian Tuirial Hydel Project panna kawnga Sawrkar hmalakna dang Serlui B Hydel Project leh Bukvanneia Oil palm herchhuahna hmunpui Godrej Agrovet Ltd. enkawl chu an tlawh nghal bawk a ni.