Tukin dar 7:00 AM khan Chief Minister Pu Lal Thanhawla, President, Mizoram Olympic Association leh Vice President, Indian Olympic Association ni bawk chuan Queen's Baton Relay Park  Rajiv Gandhi Stadium,Mualpui a mi chu  tlawh a . He huna inkhawmna tawi buatsaih chu Chief Secretary, Pu Van Hela Pachuau, IAS in kaihruaiin  Chief Minister leh a thiannu Pi Lal Riliani bakah ah Ministers, Parliamentary Secretaries, MLA te leh Sawrkar Official te'n thing tiak thahnem tak an phun nghal.

Chief Minister chuan ramngaw chereu tawh siamthat leh nan thing leh mau humhalh a tul mai bakah ramruak ah te thing tam zawk kan phun belh a ngai a ni a ti.Mihring lo pung zelin ram an tih chereu zel avangin  thing  phunbelh chu zel harsatna pumpelh na kawng pawimawh tak a ni a ti. Ramngaw humhalh leh thingphun hi Forest  Department hna chauh ni lovin mi zawng zawng mawhphurhna a ni a, thingphun tluk zet in a enkawl puitlin pawh hna pawimawh a nih thu a sawi. Keini Mizoram pawhin naktuk a lo thleng tur, Commonwealth Games meichher chu chhinchhiah na atan te,  ni pawimawh leh thilchhinchhiah tlak bik lo chhinchhiah nana kan lo hman thin thingphun  hmang in kan lo chhinchhiah lawk a ni a ti. Commonwealth Games  vawi 19-na Delhi a neih tur chu kan ram Sport History a thil chhinchhiah tlak a nih thu leh hlawhtling takin India in a thlen tur thu a sawi.Mizoram sawrkar paw'n Mizo thalai infiammite thiamna leh theihna te khawvel hriata phochhuah ngei a duh a, chu mi atan chuan sawrkarin theihtawp a chhuah zel dawn a ni a ti.  Mizoramin hmun leh hmanrua te kan nei chang tlung lo chung pawhin Mizo infiammi te  hlawhtlinna leh thlen chin chu a chhuanawm takzet a ni a ti. Rajiv Gandhi Stadium, Mualpui a sak mek pawh chak tak a kalpui a nih thu a sawi a, hemi chungchang ah  Pi Sonia Gandhi, Chairperson, UPA leh Central sawrkar thuneitu pawimawh dangte nen inbiakna hlawhtling tak an neih tawh thu a sawi bawk. Planning Commission ah cheng vaibelchhe 70 additional assistance atan thlen a ni tawh a ni a ti.

Queen's Baton hi Olympic meichher ang deuhva Commonwealth Games chhinchhiahna meichher ni in Kumpinu Lalin(Buckingham Palace, London) atanga bul tanin batonbearer(meichherkengtu) hrang hrang ten commonwealth ram hrang hrang an rawn kal tlangpui hnuin June 25 ah India ram luhpui a ni a, state 28 kalchhuahpui vek a nih hnuah Opening Ceremony,  October 3 a neih na  hmun tur. Jawaharlal Nehru Stadium Delhi ah luh pui a ni ang.Queen's Baton Relay hian naktuk,  July 29 hian Aizawl a rawn thleng dawna, tlailam ah Vanapa Hall ah Reception function neihpui a ni ang. Queen  awmzia chu Kumpinu Lalnu, Elizabeth-II sawina a ni a, a ni hi Kumpinu Sawrkar atanga in la hrang tawh ram hrang (Commonwealth Nations) ten thuneihna tel lova an hotulu atan an pawm a ni.Commonwealth Games 2010, Delhi, India in vawikhat a thlenna tur, ah hian ram hrang hrang 85 atangin in infiami 8500 rawn tel tura beisei an ni.