3182/2023-2024

Dated Aizawl, the 28th December, 2028: Vawiin khan Chief Minister Pu Lalduhoma chuan a pisaah Project Pushpak Chief Engineer SP Kolipey leh a thawhpuite nena inkawmna a nei a. Mizorama Project Pushpak ten hna an thawh mekte chipchiar takin a lem (powerpoint) thlir chungin an sawi ho.

Project Pushpak te hian an kawng enkawl mek hmun thenkhata Mizoram PWD enkawl kawng lo tlazep te chu an kuta hlan ni thei se, an tan hnathawh a awlsam zawk bakah a chhawrtu mipuite tan a tha zawk nia an hriat thu Chief Minister hi an hrilh a, Champhai to Dungtlang, 58 kms a thui te, Dungtlang to N. Vanlaiphai via Thekte, 124 kms te, an kutah awm thei se an duh thu leh Sairang to Tuipuibari inkara PWD kawng tlazep awm te an hnena hlan theih ni se an ti bawk a ni.

Chief Minister hian kawng enkawltute zawng zawngin an hnathawhna in a paltlang khaw chhung kawngte ngaih pawimawh hmasakah neih zel se a duh tih a hrilh a. Project Pushpak te, NHIDCL leh PWD te inkarah inelna thianghlim awm se a duh thute pawh hrilhin, an thil dil te chu ziaka thehlut turin a chah a ni.

Project Pushpak hian Mizoramah kawng sawm (10) an enkawl mek a, an zinga pali hi an thawk zo tawh a, a dang pali hi hnathawh mek niin pahnih dang chu Lei (bridges) dawh tur awm avanga ngaihchan (pending) mek a nih thu an tarlang a ni.