3181/2023-2024
Dated Aizawl, the 28th December, 2023: Vawiin khan Chief Minister Pu Lalduhoma chuan a pisaah 'Thisen Pek' uar deuh deuh tura mipuite zirtir tura kea kal kual mek Kiran Verma, Simply Blood Founder chu a pisaah a kawm a. A hmalaknaa lawmthu hrilhin a kal zelna turah duhsakna a hlan.

Kiran Verma nen hian a thlawna thisen pek chungchanga Mizoram leh India ram state dang dinhmun te an sawi dun a. Mizoram leh Tripura chuan district tinah blood bank an neih avangin a thlawna thisen pe an tha bik thin. Mahse Mizoram hi tun hnaiah tlema a tlakhniam deuh avangin tan lak a tul nia an hriat thute an sawi dun a ni. Mizorama HIV vei an tam avanga hmalak tulna te pawh an sawi dun bawk.

Kiran Verma hian India mipuiten thisen pek (blood donation) an uar deuh deuh theih nana mipuite zirtirna (campaign) neiin kein India ram a fang mek a. Kilometer 21000 kal chhuah tumin a bei mek a, December ni 28, 2021 khan Thiruvananthapuram atangin a kal tan a ni. A thupui ber chu 'thisen dawn tur neih loh vangin tumah December, 2025 hnu lamah an thi tur a ni lo' tih a ni. Mizoram a kal zawh hian Tripura a pan leh ang.