Vawiin khan Chief Minister Pu Lal Thanhawla leh Food, Civil Supplies & Consumer Affairs Minister Pu John Rotluangliana te hovin tunlaia eirawngbawlna gas supply khawmkhawp lo leh gas khawih chingpen thinte laka chak zawk leh nazawka hmalak dan tur sawi hovin meeting pawimawh tak neih a ni. Meeting ah hian DGP Pu Thianghlima Pachau; IGP Pu Zorammawia; Food, Civil Supplies & Consumer Affairs Department Secretary Dr. Franklin Laltinkhuma; FCS &CA Director Pu R. Lalramnghaka leh a thawhpui senior officer dangte leh Central YMA Vice President Pu Vanlalruata leh CYMA OB dang pathum te an tel a ni.

Meeting ah hian CYMA Vice President Pu Vanlalruata leh a thawhpui dangte chuan CYMA in eirawngbawlna gas tihchingpen a tawp theih nan leh a tichingpentu laka hma an lak dan kimchang takin an tarlang a. Hetiang ti thin te lakah chak zawk leh huamzau zawka Police, Supply Department leh CYMA te intawiawm tawn a, tan hova hma lak dan te sawiho a ni a. Meeting chuan hetiang tihching, mimal an ni emaw, gas agent leh dealer te an ni emaw, an thil tih sualnaah a na thei ang berin dan anga hrem turin chak taka hmalak nise an ti a, gas dealer hetiang lama inhnamhnawih an awm chuan an dealership thlenga titawp turin IOC lama thlen nise an ti bawk.

Hnianghnar zawka gas supply a awm thei nan Sub-Division tinah gas agent 1 leh District Headquarter tinah gas agent pahnih tal leh Aizawl khawpui ah pawh tun aia gas agent tam zawk dah thei nan IOC ah thlen nise an ti a. Gas company dangte Mizorama an luh theih dan kawng awm thei te zirchiang turin Supply Department in hma la se tih a ni bawk a.Tunlaia gas supply thlen that loh chhan ber chu gas phurtu carrying contractor ten a phurhna man tender an chhan hniam lutuk vang a nih thu meeting ah hian sawilan niin hemi chungchang hi IOC lamah hriattir leh hei hi chingfel vat turin ngen nise an ti a. Heng thil te hi ziakin IOC Chairman hnenah thlen nise tih a ni bawk.

Eirawngbawlna gas tichingpentute lakah tun hma chuan police case chauh siamsak thin a ni a, amaherawhchu tunhnai atang khan hetianga pawi khawihtute hi police case bakah Essential Commodities Act hnuaiah pawh thubuai siamsak tawh an ni. Gas agent ten veng hrang hranga gas an sem in a bukna keng ngei turin hriattir nawn nise tih leh gas dealer-te koh khawma hemi chungchangah hian kokim zawka meeting neih leh nise tih te rel a ni bawk.