Vawiin chawhnu khan Kolasib DC Pu H. Lalengmawia IAS chuan Kawnpui Higher Secondary School tlawhin, Education Campaign a nei nghal.

Kolasib DC chuan zirna lamah Kolasib District chu țan lak nasat a țul zia sawiin, Zirlai, Zirtirtu bakah Nu leh Pa te țanrual a ngai tak zet zet a ni a ti. Tunhmain zirna lamah lo ti țha țhin tawh pawh nise, result țha leh zual nei thei tura țan la thar turin Zirlaite leh Zirtirtute a fuih a. Zirlaite tum nei ran tur leh taima tura fuihin, Zirtirtu te pawh zirlai bakah a kaihhnawih lehkhabu dang zir tela zirtirna pe turin a fuih bawk. Ruihtheih thil leh zuk leh hmuam laka fihlim turin zirlai te a chah nghal bawk a ni.

Kawnpui HSS hi Private-in kum 2003 khan din a ni a; kum 2009 khan Adhoc Grand-in-Aid ah hlankai a ni a. Kum 2010 khan NSS, school-ah hian din țan niin, vawiin khan a din champha lawmna neih a ni. Kawnpui khawchhuak Pu K. Lalthlengliana, Kolasib District Sports & Youth Officer thar hnenah lawmpuina an hlan bawk.

Kolasib DC hi Kawnpui HSS Managing Board Member ten an tawiawm a ni.